കൊച്ചിൻ ഷിപ്‌യാഡിനുകീഴിലെ മറൈൻ എൻജിനീയറിങ് ട്രെയിനിങ് ഇൻസ്റ്റിറ്റ്യൂട്ടിൽ ഒരുവർഷത്തെ ഗ്രാജ്വേറ്റ് മറൈൻ എൻജിനീയറിങ് റെസിഡൻഷ്യൽ പരിശീലനത്തിന് അപേക്ഷിക്കാം. ഈ കോഴ്സിലൂടെ മർച്ചന്റ് ഷിപ്പിൽ ജൂനിയർ മറൈൻ എൻജിനീയറാകുന്നതിനുള്ള കോംപിറ്റൻസി സർട്ടിഫിക്കറ്റ് ലഭിക്കും. പരിശീലനം ഓഗസ്റ്റിൽ ആരംഭിക്കും.
ഡയറക്ടറേറ്റ് ജനറൽ ഓഫ് ഷിപ്പിങ്ങിന്റെ അനുമതിയോടെയാണ് പരിശീലനം. ബോർഡിങ്, ലോഡ്ജിങ് ഉൾപ്പെടെ മൂന്നുലക്ഷം രൂപയാണ് ഫീസ്. വനിതകൾക്ക് 2,20,000 രൂപ.
യോഗ്യത: 50 ശതമാനം മാർക്കോടെ മെക്കാനിക്കൽ, മെക്കാനിക്കൽ ഓട്ടോമേഷൻ, നേവൽ ആർക്കിടെക്ടർ എൻജിനീയറിങ് ബിരുദമെടുത്തവർക്ക് അപേക്ഷിക്കാം.10, 12 ക്ലാസ് പരീക്ഷയിൽ ഇംഗ്ലീഷിന് 50 ശതമാനം മാർക്കിൽ കുറയാതെ ഉണ്ടാകണം. 157 സെന്റിമീറ്ററിൽ കുറയാത്ത ഉയരവും അതിനനുസൃതമായ ഭാരവും ഉണ്ടായിരിക്കണം. നല്ല കാഴ്ചശക്തിയുണ്ടാവണം. സൈക്കോളജിക്കൽ സ്‌ക്രീനിങ് ടെസ്റ്റിലൂടെയാണ് തിരഞ്ഞെടുപ്പ്.
അപേക്ഷാഫോറവും വിശദവിവരങ്ങളും www.cochinshipyard.com എന്ന വെബ്‌സൈറ്റിൽനിന്ന്‌ ഡൗൺലോഡ് ചെയ്യാം. പൂരിപ്പിച്ച അപേക്ഷ സ്പീഡ്‌പോസ്റ്റിൽ ജൂലായ് മൂന്നിന് മുമ്പായി ലഭിക്കണം. ഫോൺ: 0484 2501437/2501223.