പോളിടെക്‌നിക് പ്രവേശന നടപടികള്‍ പരിഷ്‌കരിച്ചു
വിദ്യാര്‍ഥികള്‍ക്കും രക്ഷിതാക്കള്‍ക്കും ഉപകാരപ്രദമാകുന്ന രീതിയില്‍ പോളിടെക്‌നിക് പ്രവേശന നടപടി പരിഷ്‌കരിച്ചു. യോഗ്യതാ പരീക്ഷയ്ക്കു ലഭിച്ച ഗ്രേഡ് പോയിന്റു പ്രകാരം കണക്കാക്കിയ ഇന്‍ഡക്‌സ് മാര്‍ക്കിന്റെ അടിസ്ഥാനത്തില്‍ തയാറാക്കുന്ന റാങ്ക് പട്ടികയില്‍നിന്നാണു പ്രവേശനം. താല്‍ക്കാലിക റാങ്ക് പട്ടികയും ട്രയല്‍ അലോട്‌മെന്റും ആദ്യം പ്രസിദ്ധീകരിക്കും. ട്രയല്‍ അലോട്‌മെന്റില്‍ പരാതിയുണ്ടെങ്കില്‍ സമര്‍പ്പിക്കാനും ഓപ്ഷന്‍ മാറ്റിക്കൊടുക്കാനും അവസരമുണ്ട്. തുടര്‍ന്നു റാങ്ക് പട്ടികയും അലോട്‌മെന്റും പ്രസിദ്ധീകരിക്കും.
ആദ്യ ചോയ്‌സ് തന്നെ അലോട് ചെയ്തിട്ടുണ്ടെങ്കില്‍ അതു ലഭിച്ച സ്ഥാപനത്തില്‍ ലഭിച്ച ബ്രാഞ്ചില്‍ മുഴുവന്‍ ഫീസും അടച്ചു പ്രവേശനം നേടണം. ഇല്ലെങ്കില്‍ പ്രവേശന നടപടിയില്‍നിന്നു പുറത്താകും. വിദ്യാര്‍ഥിക്ക് ഒന്നാമത്തെ ഓപ്ഷന്‍ ലഭിക്കാത്തതിനാല്‍ കിട്ടിയ ഓപ്ഷന്‍ മതിയെങ്കില്‍ ഉയര്‍ന്നവ റദ്ദാക്കി അഡ്മിഷന്‍ ലഭിച്ച ബ്രാഞ്ചില്‍ മുഴുവന്‍ ഫീസും അടച്ചു പ്രവേശനം നേടണം. പ്രവേശനം നേടിയാല്‍ അവര്‍ക്കു വേറൊരു അവസരം ലഭിക്കില്ല.
വിദ്യാര്‍ഥിക്കു കിട്ടിയ ബ്രാഞ്ച് നിലനിര്‍ത്തുകയും ഒപ്പം ഉയര്‍ന്ന ഓപ്ഷനു ശ്രമിക്കുകയും ചെയ്യണമെങ്കില്‍ സൗകര്യപ്രദമായ സര്‍ക്കാര്‍, എയ്ഡഡ് പോളിടെക്‌നിക്കുകളില്‍ അപേക്ഷയോടൊപ്പം പറഞ്ഞിട്ടുള്ള എല്ലാ സര്‍ട്ടിഫിക്കറ്റുകളും സമര്‍പ്പിച്ചു റജിസ്റ്റര്‍ ചെയ്യണം. റജിസ്‌ട്രേഷനോടൊപ്പം ഫീസ് അടയ്‌ക്കേണ്ട. തുടര്‍ന്നുള്ള അലോട്‌മെന്റുകളില്‍ ഇഷ്ടപ്പെട്ട ബ്രാഞ്ച് ലഭിച്ചാല്‍ പ്രവേശനം നേടുകയും ഓണ്‍ലൈനായിത്തന്നെ കിട്ടിയ അലോട്‌മെന്റുകള്‍ നിലനിര്‍ത്തുകയോ ഓപ്ഷനുകള്‍ അറേഞ്ച് ചെയ്യുകയോ ചെയ്യാം.
ഉയര്‍ന്ന ഓപ്ഷനുകള്‍ മാത്രം നിലനിര്‍ത്തണമെങ്കില്‍ സൗകര്യപ്രദമായ സര്‍ക്കാര്‍, എയ്ഡഡ് പോളിടെക്‌നിക്കില്‍ ഉയര്‍ന്ന ഓപ്ഷന്‍ മാത്രം റജിസ്റ്റര്‍ ചെയ്യാം. അവര്‍ക്കു ലഭിച്ച അലോട്‌മെന്റ് നഷ്ടപ്പെടും. തുടര്‍ന്നുള്ള അലോട്‌മെന്റില്‍ ഉയര്‍ന്ന ഓപ്ഷനു മാത്രം ശ്രമിക്കാം. ഉയര്‍ന്ന ഓപ്ഷനുകള്‍ പരസ്പരം മാറ്റുകയോ ഏതെങ്കിലും ഉയര്‍ന്ന ഓപ്ഷനുകള്‍ ഇല്ലാതാക്കുകയോ ചെയ്യാം. ഇപ്പോള്‍ നാല് അലോട്‌മെന്റാണ് പ്രോസ്‌പെക്ടസില്‍ പറഞ്ഞിട്ടുള്ളത്. അന്തിമ അലോട്‌മെന്റിനു മുന്‍പ് ഓപ്ഷനുകളില്‍ മാറ്റം വരുത്താനും വേണ്ടാത്തത് ഒഴിവാക്കാനും അവസരമുണ്ട്. അന്തിമ അലോട്‌മെന്റില്‍ ലഭിക്കുന്ന ബ്രാഞ്ചില്‍ പ്രവേശനം നേടണം.
https://www.facebook.com/Malayalivartha
