യുഎഇയില്‍ അടുത്ത വര്‍ഷത്തോടെ തൊഴിലവസരങ്ങള്‍ വര്‍ധിച്ചേക്കും എന്ന് റിപ്പോര്‍ട്ട്. റോബര്‍ട്ട് ഹാഫ് പുറത്തിറക്കിയ 2025 ലെ സാലറി ഗൈഡ് അനുസരിച്ച് യുഎഇയിലെ അഞ്ച് ബിസിനസ് സംരംഭങ്ങളില്‍ മൂന്നെണ്ണവും അടുത്ത ഒരു വര്‍ഷത്തിനുള്ളില്‍ കൂടുതല്‍ തൊഴിലാളികളെ നിയമിച്ചേക്കും എന്നാണ് പറയുന്നത്.

വിദേശ ജോലി സ്വപ്നം കാണുന്നവർക്ക് വീണ്ടും അവസരങ്ങളുമായി കേരള സർക്കാറിന് കീഴില്‍ പ്രവർത്തിക്കുന്ന പൊതുമേഖല സ്ഥാപനമായ ഒഡെപെക്. വിശ്വാസ്യതയോടൊപ്പം തന്നെ തികച്ചും ഫ്രീയായി റിക്രൂട്ട്മെന്റ് നടത്തുന്നു എന്നുള്ളതാണ് ഒഡെപെക്കിന്റെ പ്രത്യേകത. യു എ ഇയിലേക്കാണ് സ്ഥാപനം ഇപ്പോള്‍ ഏറ്റവും പുതിയ റിക്രൂട്ട്മെന്റ് പ്രഖ്യാപിച്ചിരിക്കുന്നത്.

ഇൻഡസ്ട്രിയൽ മെഡിസിൻ വിഭാഗത്തിലേക്ക് നഴ്സുമാരേയാണ് ആവശ്യമുള്ളത്. പുരുഷന്‍മാർക്ക് മാത്രമാണ് ഈ വിഭാഗത്തിലേക്ക് അപേക്ഷിക്കാന്‍ സാധിക്കുക. യു എ ഇയിലെ പ്രശസ്തമായ ആശുപത്രിക്ക് കീഴിലായിരിക്കും ജോലി. ബി എസ്‌ സി നഴ്‌സിംഗ് / പോസ്റ്റ് ബേസിക് ബി എസ്‌ സി നഴ്‌സിംഗ് യോഗ്യതയുള്ളവർക്ക് ഈ ഒഴിവിലേക്ക് അപേക്ഷിക്കാം. ഐ സി യു, എമർജൻസി, അടിയന്തര പരിചരണം, ക്രിട്ടിക്കൽ കെയർ, ഓയിൽ ആൻഡ് ഗ്യാസ് നഴ്‌സിംഗ് എന്നിവയിൽ കുറഞ്ഞത് 2 വർഷത്തെ പരിചയവുമുണ്ടായിരിക്കണം. അതോടൊപ്പം തന്നെ ഡി ഒ എച്ച് ലൈസന്‍സ് അല്ലെങ്കില്‍ ഡി ഒ എച്ച് ഡാറ്റാഫ്ലോ ഫലം ഉണ്ടായിരിക്കണം. ഉടനടി ജോലിക്ക് ചേരാന്‍ താല്‍പര്യമുള്ളവർക്ക് മുന്‍ഗണന ലഭിക്കും. പ്രായപരിധി: 40 വയസ്സിൽ താഴെ.

ആഴ്ചയില്‍ 60 മണിക്കൂർ ജോലിയുണ്ടാകും. വിസ, വിമാന ടിക്കറ്റ്, മെഡിക്കല്‍ ഇന്‍ഷൂറന്‍ എന്നിവ കമ്പനി നല്‍കും. വർഷത്തില്‍ ശമ്പളത്തോട് കൂടി ഒരു മാസത്തെ അവധി ലഭിക്കും. 5000 യു എ ഇ ദിർഹമാണ് ശമ്പളം. അതായത് ഇന്ത്യന്‍ രൂപയില്‍ കണക്കാക്കുയാണെങ്കില്‍ 1.14 ലക്ഷം രൂപയിലേറെ. താൽപ്പര്യമുള്ള ഉദ്യോഗാർത്ഥികൾക്ക് വിശദമായ സി വി, ഡി ഒ എച്ച് ലൈസൻസിൻ്റെ പകർപ്പ്, ഡി ഒ എച്ച് ഡാറ്റാഫ്ലോ ഫലം എന്നിവ 2024 നവംബർ 20-നോ അതിനു മുമ്പോ gcc@odeoec.in എന്ന മെയിലിലേക്ക് അയക്കണം. ഇമെയിലിൻ്റെ സബ്‌ജക്റ്റ് ലൈൻ Male Industrial Nurse to UAE എന്നതായിരിക്കണം.