സായുധ പൊലീസിലെ സിവില് പൊലീസ് ഓഫീസര്മാരെ സ്മാര്ട്ടാക്കാനൊരുങ്ങുന്നു പി.എസ്.സി
സായുധ പൊലീസിലെ സിവില് പൊലീസ് ഓഫീസര്മാരെ സ്മാര്ട്ടാക്കാന് വിദ്യാഭ്യാസ യോഗ്യതയും ഉയരവും പി.എസ്.സി കൂട്ടി. പുതുക്കിയ യോഗ്യത പ്രകാരമുള്ള നിയമന നടപടി ഉടന് ആരംഭിക്കും. യോഗ്യത പത്താം ക്ളാസില് നിന്ന് പ്ളസ് ടു ആക്കിയതോടെ അടുത്ത ശമ്പള പരിഷ്കരണത്തില് സ്കെയിലും ഉയരും. നിലവില് 22,200- 48,000 രൂപയാണ് സ്കെയില്. അടുത്ത വാര്ഷിക ലിസ്റ്റില് നിന്ന് ആറായിരത്തിലേറെ പുരുഷന്മാര്ക്കും ആയിരത്തോളം വനിതകള്ക്കും നിയമന സാദ്ധ്യതയുണ്ടാകും.
സംസ്ഥാന ആഭ്യന്തരവകുപ്പിന്റെ ആവശ്യപ്രകാരമാണ് യോഗ്യതയും ശാരീരിക അളവും വര്ദ്ധിപ്പിച്ചത്. സേനാംഗങ്ങളെ കൂടുതല് കരുത്തരാക്കാന് വേണ്ടിയാണിത്. പുരുഷ അപേക്ഷകരുടെ ഉയരം 167 സെന്റിമീറ്ററില് നിന്ന് 168 ആക്കി. നെഞ്ചളവ് 81 സെന്റിമീറ്റര്. വികസിപ്പിക്കുമ്പോള് 86. വനിതകളുടെ പൊക്കം 152 സെന്റിമീറ്ററില്നിന്ന് 157 ആക്കി.
ജനറല് വിഭാഗത്തിനും മറ്റ് പിന്നാക്ക വിഭാഗക്കാര്ക്കും ഉയരും ഒന്നു തന്നെ. പട്ടികജാതി/വര്ഗ പുരുഷന്മാരുടെ ഉയരം 159 സെന്റിമീറ്ററില്നിന്ന് 160 ആക്കി. നെഞ്ചളവ് 76. വികസിപ്പിക്കുമ്പോള് 81. പട്ടികജാതി/ വര്ഗ വനിതകള്ക്ക് ഉയരം 150 സെന്റിമീറ്റര് മതി .
വനിതാ ബറ്റാലിയന്
വനിതാ ബറ്റാലിയനിലേക്ക് നാളെ വിജ്ഞാപനമിറങ്ങും. ജനുവരി 31ന് രാത്രി 12 മണിവരെ അപേക്ഷിക്കാം
https://www.facebook.com/Malayalivartha