ബിഗ് ബോസ് മലയാളം സീസൺ രണ്ട് പകുതി ദിനങ്ങൾ പിന്നിട്ട് മുന്നേറുകയാണ്. ബിഗ് ബോസ് ഹൗസിൽ അവശേഷിക്കുന്ന മത്സരാർത്ഥികളുടെ സ്വഭാവം ഏകദേശം പുറത്തായിക്കഴിയുകയും ചെയ്തു. എന്നാലിപ്പോഴും ദുരൂഹമായി തുടരുന്നത് ഒരേയൊരു മത്സരാർഥിയാണ്. സുജോ മാത്യു. ഇയാൾ വില്ലന്നാണോ അതോ നായകനാണോ എന്ന് കൂടെയുള്ള മറ്റ് മത്സരാർത്ഥികൾക്ക് പോലും മനസ്സിലാക്കാൻ സാധിക്കുന്നില്ല. ഇതിനു കാരണം സുജോയുടെ ഇതുവരെ വായിച്ചെടുക്കാൻ സാധിക്കാത്ത സ്വഭാവം തന്നെയാണ്. കണ്ണിനസുഖം ബാധിച്ച് ഒരിടവേളക്ക് ശേഷം തിരിച്ചെത്തിയ സുജോ അടിമുടി മാറിയിരുന്നു. രജിത്ത് കുമാറിനെ കയ്യേറ്റം ചെയ്യാൻ വരെ ശ്രമിച്ച സുജോ തിരിച്ചെത്തിയപ്പോൾ രജിത്തിനോട് വലിയ സ്നേഹപ്രകടനം നടത്തുന്നതും ഒത്തുചേർന്ന് മത്സരിക്കുന്നതുമാണ് പ്രേക്ഷകർ കാണുന്നത്. എന്നാലിത് സുജോയുടെ സ്ട്രാറ്റജി മാത്രമാണെന്നതിന് തെളിവുകൾ കഴിഞ്ഞ ദിവസങ്ങളിൽ ലഭിച്ചിരുന്നു.

സുജോ രജിത് കുമാറും രഘുവുമായി ചേർന്നാണ് മത്സരങ്ങളിൽ പങ്കെടുത്തിരുന്നത്. സുജോയ്ക്ക് വേണ്ടി രജിത്ത് കുമാർ തന്റെ സ്ഥാനം ഒഴിഞ്ഞു കൊടുത്തപ്പോൾ പകരമായി സുജോ മത്സരിക്കുകയും മാത്രമല്ല സുജോയുടെ സ്വർണ്ണ നിധി സൂക്ഷിക്കുന്നതിന്റെ ഭാഗമായി രജിത്ത് കുമാറിനും രഘുവിനും സുജോ തന്റെ ശേഖരത്തിൽ ഒരോഹരി നൽകുകയും ചെയ്തു. രഘുവും രജിത്ത് കുമാറും സുജോയ്ക്ക് വാരിക്കോരി കൊടുക്കുന്ന കാഴ്ചയാണ് പ്രേക്ഷകർ കാണുന്നത്.
എന്നാൽ സുജോ കൂടെനിന്ന് കാലുവാരും എന്ന് മറ്റ് മത്സരാർത്ഥികൾക്ക് പോലും സംശയം തോന്നി തുടങ്ങിയിരുന്നു. ആര്യയും വീണയും ഫുക്രുവും ജസ്ലയുമാണ് അത്തരമൊരു സംശയം പ്രകടിപ്പിച്ചത്. ടാസ്ക്കിനിടെയുള്ള നൃത്തത്തിൽ സുജോ ആര്യയും വീണയുമായി ചേർന്ന് രജിത്ത് കുമാറിന്റെ നിധി ശേഖരം തട്ടിയെടുക്കാൻ ശ്രമിച്ചിരുന്നു. എന്നാലാ ശ്രമം പരാജയപ്പെട്ടിരുന്നു. തുടർന്ന് ആര്യയും വീണയും ചേർന്ന് സുജോയെ പരീക്ഷിക്കാൻ നോക്കി. രജിത്ത് കുമാർ സൂക്ഷിച്ചിരുന്ന സുജോയുടെ സ്വർണ്ണം തട്ടിയെടുക്കാനാണ് അവർ നോക്കിയത്. രജിത്തിന്റെ കായികമായി ആക്രമിക്കുകയും ചെയ്തു. എന്നാലിതിൽ പ്രകോപിതനായ സുജോ ഇടപെടുകയും അവസാനം പ്രശ്നം രൂക്ഷമാകുകയും വലിയൊരു വാക്കുതർക്കത്തിൽ കലാശിക്കുകയും ചെയ്തു.

കഴിഞ്ഞ ദിവസവും സുജോ രജിത്ത് കുമാറിനും രഘുവിനും തന്റെ ശേഖരത്തിൽ നിന്നും ഒരോഹരി നൽകിയിരുന്നു. എന്നാൽ സുജോയുടെ ഈ പ്രവർത്തികൾക്ക് പിന്നിൽ മറ്റെന്തെങ്കിലും ദുരുദ്ദേശമുണ്ടോ എന്ന് മറ്റ് മത്സരാർത്ഥികൾക്കൊപ്പം പ്രേക്ഷകരും സംശയിക്കുന്നു. അവസാനം രജിത് കുമാറിന് എട്ടിന്റെ പണിയായി മാറുമോ സുജോയുടെ സ്നേഹമെന്നും കണ്ടറിയണം. ഏതായാലും ഇപ്പോൾ ടാസ്ക്കിൽ ഒന്നാമനായി നിൽക്കുന്നത് സുജോ മാത്യു തന്നെയാണ്. ഈ ടാസ്ക്കിലെ വോജയിക്ക് നേരിട്ട് ഗ്രാൻഡ് ഫിനാലെയിൽ എത്താമെന്നുള്ള വമ്പനൊരു ഓഫറും ബിഗ് ബോസ് നൽകിയിരുന്നു. ഇതിനുവേണ്ടിയുള്ള ശ്രമമാണോ സുജോയുടെ കൂട്ടുകുടൽ എന്ന് മാത്രമേ ഇനി അറിയേണ്ടതുള്ളൂ.