കഴിഞ്ഞ ദിവസം മലയാളികളുടെ പ്രിയപ്പെട്ട ടെലിവിഷൻ അവതാരകയും നടിയും കോമേഡിയനുമായ സുബി സുരേഷ് ഒരു അടിപൊളി ലുക്കിൽ സോഷ്യൽ മീഡിയയിൽ ഫോട്ടോ പങ്കുവച്ചിരുന്നു . പതിവുപോലെ തന്നെ സുബിയുടെ ഫോട്ടോ ശ്രദ്ധിക്കപ്പെട്ടങ്കിലും ഇത്തവണ ആ ഒരു ഫോട്ടോയും ഫോട്ടോയ്ക്ക് സുബി ആദ്യം നൽകിയ ക്യാപ്ഷനും വലിയ പ്രി ചർച്ചയ്ക്കാണ് വഴിവച്ചത്.

"ഒരു ചുവന്ന വട്ട പൊട്ടും വലിയ ഫ്രെയിം ഉള്ള കണ്ണടയും മുക്കുത്തിയും അതോടൊപ്പം മുടി മൊത്തത്തിൽ പൊക്കിക്കെട്ടി അല്പം ഗൗരവത്തോടെ നോക്കുന്ന സുബി... അതിനൊത്ത് ഒരു നീളൻ സഞ്ചിയുമുണ്ട് കൈയിൽ .. ഈ ഒരു ഫോട്ടോയ്ക്ക് സുബി കൊടുത്ത ക്യാപ്ഷൻ ഫെമിനിസ്റ്റ് എന്നാണ്. ഇതോടെ ആ പോസ്റ്റ് ഫെമിനിസ്റ്റുകളെ പരിഹസിക്കുന്നതാണ് എന്ന് ആരോപിച്ച് ഉടൻ തന്നെ സൈബറിടത്തിൽ ചർച്ചകളും തുടങ്ങി.

ഫെമിനിസ്റ്റിനെ പരിഹസിച്ചുകൊണ്ടായിരുന്നില്ല സുബി പോസ്റ്റിട്ടത്. ഫെമിനിസ്റ്റുകളോട് അടുപ്പവുമില്ല, എതിര്‍പ്പുമില്ല, അത് എന്താണെന്ന് അറിവുമില്ല എന്ന് പറഞ്ഞ് ഉടൻ തന്നെ സുബി വിശദീകരണവുമായി എത്തിയിരുന്നു... എന്നാൽ, ഇനിയും ആരും അറിയാത്ത അല്ലെങ്കിൽ എല്ലാവരും പരിഹസിക്കേണ്ട വെക്കണോ ഫെമിനിസം ?ഇത് ട്രോൾ വേർഡ് ആണോ...?

ഇപ്പോഴും പൊതുബോധത്തെ തൃപ്തിപ്പെടുത്താൻ വേണ്ടി മാത്രം ജീവിക്കുന്ന കുറെ മനുഷ്യർ ഉണ്ടെന്നാണ് ഈ പോസ്റ്റും കമന്റും ഒക്കെ സൂചിപ്പിക്കുന്നത് . ഫെമിനിസം എന്ന വാക്ക് ഒരുപാട് ചർച്ചകൾക്കും വിമർശനങ്ങൾക്കും ഒക്കെ വിധേയമായതാണ്. എങ്കിലും ഫെമിനിസം എന്നത് ഇത്തരത്തിൽ വസ്ത്രം ധരിച്ച് , ആണുങ്ങൾക്ക് നേരെ മെക്കിട്ടുകയറുന്നു സ്ത്രീകളാണ് എന്നുള്ള ബോധം പലയിടത്തും ഉണ്ട്.

അതുപോലെ സ്ത്രീകൾ മാത്രമാണ് ഫെമിനിസ്റ്റുകൾ എന്നും പലരും കരുതുന്നുണ്ട്. ഫെമിനിസ്റ്റ് എന്ന വാക്കിന്റെ അദ്യമുള്ള 'ഫെം' ആണ് ഈ തെറ്റുധാരണകൾക്കൊക്കെ കാരണം. എന്നാൽ, ഫെമിനിസം ഒരു ജൻഡർ ബേസ്ഡ് വാക്കല്ല. ഫെമിനിസം മീൻസ് ഇക്ക്വലിറ്റി. തുല്യനീതി എന്നാണ് പൊതുവേ ഫെമിനിസം കൊണ്ട് അർത്ഥമാക്കുന്നത്. ചിലർ ഇതിനെ സ്ത്രീവാദം എന്ന് വിശേഷിപ്പിക്കാറുണ്ട്. അതുകൊണ്ടാണ് ഇത് സ്ത്രീകൾക്ക് മാത്രമാണെന്ന ചിന്ത കടന്നുവരുന്നത്. ഫെമിനിസ്റ്റുകളായ നിരവധി പുരുഷന്മാരുമുണ്ട്. ഒരുകണക്കിന് എല്ലാ മനുഷ്യരും ഫെമിനിസ്റ്റുകളാണ്.

ഫെമിനിസം കൊണ്ട് ഒരുപാട് നേട്ടങ്ങൾ ആണുങ്ങൾക്കുണ്ട് എന്നതാണ് സത്യം. അവർ കടന്നുപോയ്ക്കൊണ്ടിരിക്കുന്ന ഒരുപാട് പ്രശ്ങ്ങൾക്ക് പരിഹാരം കാണാനും അതിന് സാധിക്കും. ഫെമിനിസം എന്നത് തുല്യതയ്ക്ക് വേണ്ടിയുള്ള പോരാട്ടമാണ്.

കുടുംബഭാരം മുഴുവൻ തലയിൽ ചുമന്ന് ജീവിച്ചു തീർക്കുന്ന പുരുഷന്മാർ... ജോലിക്കുവേണ്ടി അലയുമ്പോൾ കാമുകി മറ്റൊരുത്തന്റെ ഭാര്യയാകുന്നത് കാണേണ്ടി വരുന്ന കാമുകന്മാർ... അച്ഛനമ്മമാരുടെയും ഭാര്യയുടെയും കുഞ്ഞുങ്ങളുടെയും എല്ലാ ആവശ്യങ്ങളും നിറവേറ്റി ഒടുവിൽ സ്വന്തം ഇഷ്ടത്തെ കുറിച്ചുപോലും ചിന്തിക്കാൻ മറന്നുപോകുന്നവർ.

ചെറുപ്രായത്തിൽ ഒരു ഗൃഹനാഥന്റെ ചുമതല തലയിൽ വച്ച് പെങ്ങളുടെ കല്യാണവും വീടിന്റെ ലോണും പിനീട് മകളുടെ സ്ത്രീധനവും അച്ഛനമ്മമാരുടെ ചികിത്സയും നോക്കാൻ സ്വദേശത്തും വിദേശത്തും പോയി അധ്വാനിക്കേണ്ടി വരുന്നവർ.

ഇവയ്ക്കൊപ്പം ആകുലതകളും വിഷാദവും തുടങ്ങി കടം കയറി ആത്മഹത്യയ്ക്ക് വരെ നിർബന്ധിതരാകുന്ന അവസ്ഥ. ഇതും പോരാത്തതിന് പുരുഷനിയന്ത്രിതമായ അതായത് പാട്രിയാർക്കിയൽ എന്ന ഒരു സമൂഹവും ഒപ്പമുണ്ട്. അവിടെ, നീ ഒരു ആൺ ആണോ..? ആൺകുട്ടികൾ കരയാൻ പാടില്ല..ജോലിയില്ലാത്തവന് ആര് പെണ്ണ് തരും... പെണ്ണുങ്ങൾക്കുവേണ്ടി വാദിക്കുന്നോ ? അടുക്കളയിൽ ആണുങ്ങൾക്കെന്താ കാര്യം..? ആണുങ്ങളായാൽ തന്റേടം വേണം.. ഇല്ലങ്കിൽ അവനൊരു അമുൽ ബേബി.. അവൾ പറയുന്നത് കേട്ടാൽ പെൺകോന്തൻ .. അങ്ങനെ ആണുങ്ങൾ അനുഭവിക്കുന്ന കഷ്ട്ടങ്ങൾ പലവിധമാണ്.

ഇവിടെയാണ് ഇക്ക്വലിറ്റിയുടെ പ്രസക്തി . ഇക്ക്വലിറ്റി ആഗ്രഹിക്കുന്ന പുരുഷൻ പാട്രിയാർക്കിയിൽ നിന്നും പ്രിവിലേജസ് കളഞ്ഞ് പുറത്തുവരികയും സ്ത്രീകൾക്കും പ്രാധാന്യം കൊടുക്കുകയും ചെയ്യും . ഇനി ഇക്ക്വലിറ്റി ആഗ്രഹിക്കുന്ന സ്ത്രീകൾ സ്വയം ഇൻഡിപെൻഡന്റ് ആവുകയും സ്വന്തം വിദ്യാഭ്യാസം തൊഴിൽ വ്യക്തിത്വം എന്നീ അവകാശങ്ങൾക്ക് വേണ്ടി പ്രയത്നിക്കുകയും ചെയ്യും. അല്ലാതെ വെറുതെ വേഷം കെട്ടലല്ല ഫെമിനിസം.