ജിസ് ജോസിന്റെ ഏറ്റവും പുതിയ ചിത്രത്തിൽ നായകനാകുന്നത് നടൻ കുഞ്ചാക്കോ ബോബനാണ്. കശ്‍മീരില്‍ ചിത്രത്തിന്റെ ചിത്രീകരണം പൂര്‍ത്തിയായി. വിജയ് സൂപ്പറും പൗർണ്ണമിയും ചിത്രത്തിന് ശേഷം ജിസ് ജോയ് സംവിധാനം ചെയ്യുന്ന സിനിമയാണിത്. ഇപ്പോഴിതാ ഒരു രസകരമായ വീഡിയോയുമായി എത്തിയിരിക്കുകയാണ് ചാക്കോച്ചൻ. ജിസ്സേ വിശക്കുന്നു, വലതും കഴിച്ചാലോ? എന്നുപറഞ്ഞാണ് വീഡിയോ ആരംഭിക്കുന്നത്. കൈകാലുകൾ മരവിക്കുന്ന മഞ്ഞത്ത് വിശപ്പിന്റെ വിളി വന്നാൽ എന്ത് ചെയ്യും? നല്ല ഒന്നാന്തരം തണുപ്പാണ് ചാക്കോച്ചനും സംവിധായകൻ ജിസ് ജോയിയും നിക്കുന്ന ഈ സ്ഥലത്ത്. പോരെങ്കിൽ നല്ല മഞ്ഞു വീഴ്ചയും. കയ്യിൽ മറ്റു ഭക്ഷണം ഇല്ലാത്ത സ്ഥിതിക്കും, കഴിക്കാൻ വേറൊന്നും ചുറ്റുപാടും ഇല്ല എന്ന അവസ്ഥയിലും മറ്റെന്തു ചെയ്യാൻ? ഐസ് വാരി കഴിക്കുക തന്നെ. ഐസ് അഥവാ നല്ല കിടിലം മഞ്ഞ്.

'മഞ്ഞണിക്കൊമ്പിൽ' എന്ന ഗാനം ഓർത്ത് ജിസും ചാക്കോച്ചനും കൂടി കിട്ടിയ സാധനം ആസ്വദിച്ച് കഴിക്കാൻ തുടങ്ങി. പക്ഷെ എന്തോ പോരായ്മ അവർ അപ്പോഴും കണ്ടു. ചാക്കോച്ചൻ പറഞ്ഞു തുടങ്ങി, 'ശകലം ഉപ്പും മുളകും...' ബാക്കി ജിസ് പൂരിപ്പിച്ചു 'ഒരു കാരയ്‌ക്കയോ പേരക്കയോ പച്ചമാങ്ങയോ ഇട്ടാൽ അടിപൊളിയായിരിക്കും.' പിന്നെ ജിസ് ജോയിയുടെ ചോദ്യം, ചാക്കോച്ചനോട്? ആംസ്റ്റർഡാമിൽ കഴിച്ച മഞ്ഞാണോ ഈ മഞ്ഞാണോ നല്ലത്? ഇന്ത്യയിലെ മഞ്ഞാണ് നല്ലത് എന്ന് രണ്ടു പേരും ഒരുപോലെ സമ്മതിക്കുന്നു.

ബോബി-സഞ്ജയ് ഒരുക്കുന്ന കഥയ്ക്ക് തിരക്കഥയും സംഭാഷണവും ഒരുക്കുന്നത് സംവിധായകൻ തന്നെയാണ്.  നായകനായ ചാക്കോച്ചനെ കൂടാതെ സിദ്ധിഖ്, സൈജു കുറുപ്, രമേശ് പിഷാരടി, കെ.പി.എ.സി. ലളിത എന്നിവർ പ്രധാന കഥാപാത്രങ്ങളെ അവതരിപ്പിക്കുന്നു.