ഓഹരി വിപണിയിൽ ഇന്ന് മുന്നേറ്റം. ഈ വാരത്തിന്റെ തുടക്കമായ ഇന്ന് വ്യാപാരത്തിന്റെ തുടക്കത്തിൽ തന്നെ വലിയതോതിലുള്ള തിരിച്ചുവരവാണ് ഓഹരി വിപണി നടത്തിയത്. നിലവിൽ സെൻസെക്‌സ് 200 പോയിന്റിന് മുകളിലാണുള്ളത്. കുറഞ്ഞ വിലയ്ക്ക് ഓഹരികൾ വാങ്ങിക്കൂട്ടാമെന്ന ചിന്തയാണ് വിപണിയെ സ്വാധീനിച്ച ഒരു ഘടകം.

ആഗോള വിപണിയിൽ എണ്ണവില കുറഞ്ഞതാണ് മറ്റൊരു കാരണം. ഇന്ത്യ മുഖ്യമായി ആശ്രയിക്കുന്ന ബ്രെൻഡ് ക്രൂഡ് വില ബാരലിന് 114 ഡോളറിലേക്കാണ് താഴ്ന്നത്. കഴിഞ്ഞ ദിവസം ആറുമാസത്തെ ഏറ്റവും ഉയർന്ന നിലയിൽ എണ്ണവില എത്തിയിരുന്നു. സൗദി അറേബ്യയിൽ യെമനിലെ ഇറാൻ പിന്തുണയുള്ള ഹൂതി വിമതരുടെ ആക്രമണമാണ് കഴിഞ്ഞ ദിവസങ്ങളിൽ എണ്ണവില ഉയരാൻ കാരണം. വെള്ളിയാഴ്ച വലിയ തോതിലുള്ള മുന്നേറ്റത്തിന് ശേഷമാണ് ഇന്ന് എണ്ണവില കുറഞ്ഞത്.

വിദേശ നിക്ഷേപകർ ഓഹരികൾ വാങ്ങിക്കൂട്ടിയതും ഇന്ന് ഇന്ത്യൻ വിപണിയിൽ പ്രതിഫലിക്കുകയും ചെയ്തു. വെള്ളിയാഴ്ച 887 കോടിയുടെ ഓഹരികളാണ് വിദേശ നിക്ഷേപകർ വാങ്ങിയത്.

ഏഷ്യൻ വിപണിയിൽ നിന്നുള്ള അനുകൂല സൂചനകളും വിപണിയിൽ പ്രതിഫലിച്ചു. ഏഷ്യൻ വിപണികളെല്ലാം ഇന്ന് നേട്ടത്തിന്റെ പാതയിലാണ്. കൊട്ടക് മഹീന്ദ്ര, ബിഎസ്ഇ ലിമിറ്റഡ്, ജെഎസ്ഡബ്ല്യൂ സ്റ്റീൽ, അദാനി പോർട്‌സ് ഓഹരികൾ നേട്ടം സ്വന്തമാക്കുകയും ചെയ്തു.. ശ്രീറാം ഫിനാൻസ്, ടാറ്റ കൺസ്യൂമർ പ്രൊഡക്ട്‌സ്, ഇൻഫോസിസ്, ഏഷ്യൻ പെയിന്റ്‌സ്, എച്ച്ഡിഎഫ്‌സി ലൈഫ് ഓഹരികൾക്ക് നഷ്ടം നേരിട്ടു.