ബൈക്കില്‍ ലോകസഞ്ചാരം നടത്തുന്ന സ്‌പെയിനില്‍ നിന്നുള്ള വിനോദസഞ്ചാരികളായ ദമ്പതികള്‍ ജാര്‍ഖണ്ഡിലെ ദുംക ജില്ലയില്‍ വെച്ച് പീഡനത്തിനും ക്രൂര മര്‍ദ്ദനത്തിനും ഇരയായിരുന്നു. ഏഴു പേര്‍ ചേര്‍ന്ന് വിദേശ വനിതയെ പീഡനത്തിന് ഇരയാക്കിയ സംഭവത്തില്‍ വിദേശ വനിതയുടെ ഈ വീഡിയോ പങ്കുവെച്ച് സംഭവത്തില്‍ പ്രതികരിച്ചിരിക്കുകയാണ് നടന്‍ ദുല്‍ഖര്‍ സല്‍മാന്‍.

'ഈ വാര്‍ത്ത എന്നെ തകര്‍ത്തുകളഞ്ഞു. നിങ്ങളിരുവരും ഈയിടെ കോട്ടയത്ത് എത്തിയിരുന്നു. എന്റെ അടുത്ത സുഹൃത്തുക്കള്‍ക്കൊപ്പം ഭക്ഷണം കഴിച്ചിരുന്നു. ഇത്തരമൊരു ദുരനുഭവം ആര്‍ക്കും ഒരിടത്തുമുണ്ടാവരുത്' എന്നാണ് ദുല്‍ഖര്‍ വീഡിയോ പങ്കുവെച്ച് കുറിച്ചത്. അര്‍ധരാത്രിയോടെ ഹന്‍സ്ദിഹ മാര്‍ക്കറ്റിനു സമീപമുള്ള ആളൊഴിഞ്ഞ സ്ഥലത്ത് ടെന്റ് കെട്ടി ഉറങ്ങുകയായിരുന്നു ദമ്പതികള്‍. ഇതിനിടെ സമീപത്തുണ്ടായിരുന്ന യുവാക്കള്‍ ടെന്റിലേക്ക് അതിക്രമിച്ച് കയറി ബലാത്സംഗം ചെയ്യുകയായിരുന്നു.

ബൈക്കില്‍ ലോകസഞ്ചാരം നടത്തുന്നവരാണ് ഇവര്‍. നേപ്പാള്‍ യാത്രയ്ക്ക് മുന്‍പ് ഇവര്‍ കേരളവും സന്ദര്‍ശിച്ചിരുന്നു. ദുംക വഴി ഭഗല്‍പൂരിലേക്ക് ബൈക്ക് യാത്ര ചെയ്യുന്നതിനിടെയാണ് സംഭവമുണ്ടായത്.
'ഞങ്ങള്‍ ഇന്ത്യയിലാണ്. ഏഴ് പുരുഷന്മാര്‍ ചേര്‍ന്ന് റേപ്പ് ചെയ്തുവെന്നും തങ്ങളെ മര്‍ദിക്കുകയും സാധനങ്ങള്‍ മോഷ്ടിക്കുകയും ചെയ്തുവെന്നും ഇവര്‍ പങ്കുവെച്ച വീഡിയോയില്‍ പറഞ്ഞു. അധികം വസ്തുക്കള്‍ മോഷ്ടിച്ചില്ല എന്നും കാരണം അവര്‍ക്ക് റേപ്പ് ചെയ്യുകയാണ് വേണ്ടിയിരുന്നത് എന്നും ഇവര്‍ വ്യക്തമാക്കി. ഞങ്ങളിപ്പോള്‍ പൊലീസിനൊപ്പം ആശുപത്രിയിലാണ്' എന്നുമാണ് ദമ്പതികള്‍ വീഡിയോ പങ്കുവച്ചിരിക്കുന്നത്.മുറിവേറ്റ് രക്തം വരുന്ന ഇരുവരേയും വീഡിയോയില്‍ കാണാം.