കോവിഡ് 19 പശ്ചാത്തലത്തിൽ സൗദി അറേബ്യയിൽ ഇഖാമ, വീസാ കാലാവധി അവസാനിച്ചവർക്ക് നീട്ടിനൽകാൻ തീരുമാനിച്ചതായി റിപ്പോർട്ട് . നേരത്തേ അനുവദിച്ച ഇളവുകൾ ഈ മാസം അവസാനിക്കാനിരിക്കെയാണ് മൂന്ന് മാസത്തേക്ക് കൂടി ഇളവുകൾ സൗജന്യമായി സൗദി അനുവദിക്കുന്നത്. സൗദി ഭരണാധികാരി സൽമാൻ രാജാവ് പ്രഖ്യാപിച്ച ഇളവുകളുടെ ഭാഗമായി ആഭ്യന്തര മന്ത്രാലയമാണ് പ്രവാസി മലയാളികൾക്കടക്കം ആശ്വാസകരമായ പുതിയ തീരുമാനം അറിയിച്ചുകൊണ്ട് രംഗത്ത്എത്തിയത്. .

അതേസമയം ഇഖാമ കാലാവധി അവസാനിച്ചവർക്ക് മൂന്ന് മാസത്തേക്ക് കൂടി നീട്ടിനൽകുമെന്നതാണ് പ്രധാന പ്രഖ്യാപനം എന്നതാണ്. വിമാന സര്‍വീസ് റദ്ദാക്കിയതിനാൽ നാട്ടില്‍ പോകാനാകാതെ കുടുങ്ങിയ പ്രവാസികളുടെ ഫൈനല്‍ എക്സിറ്റ് വീസ സൗജന്യമായി നീട്ടി നല്‍കാനും ഇതിനോടകം തന്നെ തീരുമാനിച്ചിട്ടുണ്ട്. അവധിക്ക് നാട്ടിലേക്ക് പോയി മടങ്ങി വരാനാകാത്തതിനാൽ ഇഖാമ കാലാവധി തീർന്നവർക്കും തീരാനിരിക്കുന്നവർക്കും മൂന്ന് മാസത്തേക്കുകൂടി ഇഖാമ സൗജന്യമായി നീട്ടി നൽകുമെന്നും അധികൃതർ വ്യക്തമാക്കിയിരുന്നു.

അതോടൊപ്പം തന്നെ റീ എൻട്രി കാലാവധിയും നീട്ടി നൽകും. സന്ദര്‍ശന വീസയിലെത്തി, വിമാനസര്‍വീസ് റദ്ദാക്കിയതിനാൽ സൗദിയില്‍ കുടുങ്ങിയവർക്കും മൂന്ന് മാസത്തേക്ക് കൂടി കാലാവധി നീട്ടും. വിദേശികളുടെ ഇഖാമ പുതുക്കുന്നതോടെ ആശ്രിതരുടെ ഇഖാമ കാലാവധിയും നീട്ടി നൽകും. കോവിഡ് പ്രതിസന്ധി ഉണ്ടായ ഉടനെ ഇഖാമയും വീസകളും മൂന്നുമാസത്തേക്ക് സൗജന്യമായി പുതുക്കി നൽകിയിരുന്നു. ആ കാലാവധി ഈ മാസം അവസാനിക്കാനിരിക്കെയാണ് ആനുകൂല്യം മൂന്നുമാസത്തേക്ക് വീണ്ടും നീട്ടിനൽകുന്നത്.