ഗുരുവെന്നാൽ പ്രകാശം പരത്തുന്നവർ എന്നർത്ഥം.

അജ്ഞത എന്ന ഇരുട്ടിനെ അകറ്റി അറിവെന്ന പ്രകാശം പരത്തുന്നവർ..
എന്നാൽ ഇവിടെ അധ്യാപകൻ എന്ന വിശേഷണത്തിനു ഒട്ടും അര്ഹനല്ലത ഒരുവൻ കാരണം ; അല്ല , പ്രതികരണശേഷി പോലും ഇല്ലാത്ത ചില അധ്യാപകമാന്യന്മാർ കാരണം ഒരു ജീവിതമാകെ ഇരുട്ട് പടർന്നിരിക്കുന്നു.. ഒരു കുടുംബത്തിന്റെ പ്രകാശം അസ്തമിച്ചിരിക്കുന്നു..

ഒരു സസ്പെന്ഷനിൽ ഒതുക്കാവുന്നതാണോ ഷജിൻ എന്ന ആ നരാധമൻ ചെയ്ത കുറ്റം?
സർക്കാർ ശമ്പളവും എല്ലാ ആനുകൂല്യങ്ങളും പറ്റി സുഖ വാസത്തിലിരിക്കാൻ മാത്രം എന്ത് യോഗ്യതയാണ് അയാൾക്കുള്ളത്. അറിവില്ലായ്മയല്ലിത്.. നിങ്ങളുടെ ഈഗോ .. ഷഹ്‌ലയുടെ കാലിലെ മുറിവ് കണ്ട് അത് പാമ്പു കടിച്ചതാണെന്നു കുട്ടികൾ പറഞ്ഞപ്പോൾ അത് അംഗീകരിച്ചുകൊടുക്കാതെ ആണി കൊണ്ടതായിരിക്കാം എന്ന ഊഹത്തിലെത്തിച്ചേരാൻ നിങ്ങളെ പ്രേരിപ്പിച്ചത് മറ്റൊന്നുമല്ല ഷജിൻ..തന്റെ ശിഷ്യരുടെ മുന്നിൽ അറിവില്ലായ്മ വെളിപ്പെട്ടു പോകുമോ എന്ന ഭയം..കുഞ്ഞുങ്ങൾ പറയുന്നത് അംഗീകരിക്കാൻ കഴിയാത്ത നിങ്ങളുടെ ഈഗോ..അതൊന്നുകൊണ്ട് മാത്രമാണ് .. ഇന്ന് ഒരു ജീവൻ നിങ്ങൾ കാരണം അസ്തമിച്ചത്. നിങ്ങളതിന് മറുപടി പറഞ്ഞെ മതിയാകു..നിങ്ങൾ മാത്രമല്ല ..ഒരു കുഞ്ഞിന്റെ നിസ്സഹായത കണ്ടിട്ടും അല്പം പോലും മനുഷ്യത്വം കാണിക്കാത്ത നിങ്ങളുടെ സഹാധ്യാപകരും.

ഷഹ ലാ , മാപ്പു ചോദിക്കാൻ പോലും അര്ഹത യില്ലാത്ത തെറ്റാണ് നിന്നോട് ചെയ്തത്. . അല്ലെങ്കിലും ജീവിച്ചിരിക്കുമ്പോൾ നീതി നിഷേധിച്ചിട്ടു ഇനി പ്രഹസനങ്ങൾക്കു എന്ത് പ്രസക്തി?
മാഷെ എന്നും ടീച്ചറെ എന്നും നീ വിളിച്ച ആ അധമന്മാർക്ക് പരമാവധി ശിക്ഷ നല്കാൻ കഴിയണം. അധ്യാപകർ എന്ന് വിശേഷിപ്പിക്കാൻ കഴിയാത്തത്രയും അധഃപതിച്ചവരാണവർ .

തന്റെ മുന്നിലിരിക്കുന്ന വിദ്യാർത്ഥികളെ തന്റെ മക്കളായി കാണാൻ സാധിക്കാത്തിടത്തോളം അധ്യാപകൻ എന്ന മഹത്വമണിയാൻ നിങ്ങൾക്ക് എന്ത് യോഗ്യതയാണുള്ളത്?

അറിവല്ല ,തിരിച്ചറിവാണ് വേണ്ടത്.. .ഷഹ ലയുടെ കൂട്ടുകാർക്കു ഉണ്ടായിരുന്ന തിരിച്ചറിവിന്റെ ഒരു അംശം പോലും അധ്യാപകർ എന്നു ഊറ്റം കൊള്ളുന്ന നിങ്ങൾക്കുണ്ടായില്ലല്ലോ?
തന്നെ പാമ്പു കടിച്ചതാണ് ടീച്ചറെ ഹോസ്പിറ്റലിൽ പോണം എന്ന് ഒരു പിഞ്ചു കുട്ടി കരഞ്ഞു പറഞ്ഞിട്ടും ആ കണ്ണീരിനു മുന്നിൽ കരിങ്കൽ ഹൃദയവുമായി നിന്ന വിവേക ശൂന്യനായ ഒരുവൻ കാരണം പൊലിഞ്ഞുപോയത് ഒരു ജീവനാണ്..

അനാസ്ഥയാണ് ഇത്.. നിഷ്ടൂരമായ കൊലപാതകം ..സർവീസിൽ തുടരാൻ അല്പം പോലും യോഗ്യതയില്ലാത്ത ഒരുവനെയാണ് അധികാരികളെ നിങ്ങൾ സസ്പെന്ഷന് എന്ന തലോടലിൽ നിർത്തിയിരിക്കുന്നത്. കുറ്റവാളിയെ ഒരു നിമിഷം പോലും വൈകാതെ സർവീസിൽനിന്നും പിരിച്ചു വിടുക..അതാണ് ഇനി ആ കുഞ്ഞു ജീവനോട്അധികാരികൾക്കു പുലർത്താൻ കഴിയുന്ന നീതി..

മാതാ പിതാ ഗുരു ദൈവം എന്നാണ് നമ്മുടെ കുഞ്ഞുങ്ങളെ നാം പഠി പ്പിക്കുന്നത്. എന്നാൽ ഈ വിശേഷണത്തിന് എന്ത് അര്ഹതയാണ് ഈ അധ്യാപകർക്കുള്ളത്? അറിവ് നേടാനായി രാവിലെ വിദ്യാലയങ്ങളിലേക്ക് നമ്മുടെ മക്കളെ പറഞ്ഞു വിടുന്നത് അധ്യാപകർ നമുക്കു പകരമായി അവിടുണ്ടെന്നുള്ള വിശ്വാസത്തിന്മേലാണ്.. ആ വിശ്വാസത്തിന്റെ കടയ്ക്കലാണ് അധ്യാപകരെ നിങ്ങളിൽ ചിലർ കത്തി വെച്ചത്...

കള്ള വയറുവേദനയും കള്ള തലവേദനയും പറയുമ്പോഴും കരുതലോടെ കൂട്ടുകാരോടൊപ്പം..അതുമല്ലെങ്കിൽ സ്വന്തം ഉത്തരവാദിത്വത്തോടെ ...കരുതലോടെ വീട്ടിൽ സുരക്ഷിതരായി എത്തിക്കുന്ന...അമ്മയുടെയും ..അച്ഛന്റെയും ..സ്നേഹ വായ്പുകൾ അതെ അളവിൽ പകർന്നു തന്ന..അധ്യാപകരുണ്ടായിരുന്നു നമ്മുടെ വിദ്യാലയങ്ങളിൽ..ഇപ്പോഴും അവശേഷിക്കുന്നുണ്ട് നന്മ വറ്റാത്ത ചിലർ.. അവർക്കു അപവാദമായി..പാമ്പിനേക്കാൾ വിഷം മനസിൽ കുത്തി നിറച്ച കൊലയാളികളെ നമ്മുടെ വിദ്യാലയങ്ങൾക്ക് ആവശ്യമുണ്ടോ..

ആക്ഷേപം ഇപ്പോഴും ദൈവ തുല്യരായ...അധ്യാപകരോടല്ല..ആ പദവിയുടെ മഹത്വമറിയാത്ത...മനുഷ്യത്വത്തിന്റെ കണികപോലുമില്ലാത്ത, അധ്യാപകർ എന്ന പദവി മാത്രം അലങ്കാരമായി കാണുന്ന ചില നികൃഷ്ടരോടാണ്.. കണ്മുന്നിൽ ഒരു കുരുന്നു ജീവൻ പിടഞ്ഞു വീഴുമ്പോഴും .. അവളുടെ കൂട്ടുകാർ കരഞ്ഞപേക്ഷിച്ചിട്ടും ഉണരാത്ത മനുഷ്യത്വത്തെ നിങ്ങൾ എവിടെയാണ് കുഴിച്ചുമൂടിയത്..

ഷഹ്‌ ല , നിന്റെ കൂട്ടുകാർ..അവർ ഒരു പ്രതീക്ഷയാണ്.. ആ കുരുന്നുകൾ ഉറച്ച ശബ്ദത്തോടെ പ്രതികരിച്ചിരുന്നില്ലെങ്കിൽ നിന്റെ കൊലയാളികൾ ഇപ്പോഴും സുരക്ഷിതരായേനെ..ആ കുഞ്ഞുങ്ങളുടെ മൂർച്ചയേറിയ ചോദ്യങ്ങൾക്കു മറുപടി പറയാനുള്ള ബാധ്യത ബത്തേരി സർവജന സ്കൂളിലെ അധ്യാപകരുടേതാണ്..

അനീതിയുണ്ടായാൽ അതിനെതിരെ വിരൽ ചൂണ്ടാൻ ഭയപ്പാടെതുമില്ലാതേ , ഉറച്ച നിലപാടുകളോട് കൂടി ശബ്ദമുയർത്താൻ ആർജ്ജവമുള്ള ഒരു തലമുറ ഉയർന്നു വരുന്നുണ്ടെന്നത് മാത്രമാണ് നമുക്കാശ്വസിക്കാവുന്ന ഏക പ്രതീക്ഷ