ചക്രവാതച്ചുഴിയും ന്യൂനമര്‍ദ്ദപാത്തിയും..... സംസ്ഥാനത്ത് രണ്ടു ദിവസംകൂടി ശക്തമായ വേനല്‍മഴ തുടരും.... ശനിയാഴ്ചയ്ക്കു ശേഷം വേനല്‍മഴയുടെ ശക്തി പൊതുവേ കുറയും. എന്നാല്‍ മദ്ധ്യ, വടക്കന്‍ ജില്ലകളില്‍ മഴ കാര്യമായി കുറയുകയില്ല. വടക്കന്‍ മേഖലയില്‍ ചെറിയ തോതില്‍ മേഘവിസ്‌ഫോടന സാദ്ധ്യത.

കാലവര്‍ഷം 31ന് എത്തുമെന്നാണ് പ്രവചനമെങ്കിലും അതിലും നേരത്തേ എത്താനാണ് സാദ്ധ്യതയേറെയുള്ളത്. കേരളതീരത്തിന്റെ തെക്ക് 500 കിലോമീറ്റര്‍ അകലെ കാലവര്‍ഷം രൂപപ്പെട്ടു, കഴിഞ്ഞ ദിവസം കോഴിക്കോട് കുന്ദമംഗലത്ത് 24 മണിക്കൂറില്‍ 20.8 സെന്റീമിറ്റര്‍ മഴ ലഭിച്ചു. ഇത് മേഘ വിസ്‌ഫോടനത്തിന്റെ ലക്ഷണമാണ്. രണ്ടു മണിക്കൂറില്‍ 5 മുതല്‍ 10 സെന്റീ മീറ്റര്‍വരെ മഴ ലഭിച്ചാല്‍ അത് ലഘു മേഘവിസ്‌ഫോടനമായാണ് കണക്കാക്കുന്നത്.റിമാല്‍ ചുഴലി ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദം 25ന് തീവ്ര ന്യൂനമര്‍ദ്ദമായി ബംഗ്ലാദേശിലോ മ്യാന്‍മറിലോ എത്തിയേക്കും.

ഇത് ചുഴലിക്കാറ്റായി രൂപപ്പെടാനുള്ള സാദ്ധ്യതയുമേറെയാണ്. ഇത്തരം ചുഴലിക്കാറ്റിന് റിമാല്‍ എന്നാണ് പറയുക. നിലവില്‍ ഇതിന്റെ സ്വാധീനം കേരളത്തെ ബാധിക്കാനിടയില്ലെങ്കിലും കേരള തീരത്ത് കടലാക്രമണ സാദ്ധ്യത കൂടുതലായതിനാല്‍ മത്സ്യബന്ധനം പാടില്ല.

ഇന്ന് പത്തനംതിട്ട, കോട്ടയം, ഇടുക്കി ജില്ലകളില്‍ഓറഞ്ച് അലര്‍ട്ടും തിരുവനന്തപുരം, കൊല്ലം, ആലപ്പുഴ, എറണാകുളം, തൃശ്ശൂര്‍, പാലക്കാട് ജില്ലകളിലും യെല്ലോ അലര്‍ട്ടും പ്രഖ്യാപിച്ചു.

അതേസമയം ഇന്നലെ പെയ്ത മഴയില്‍ സംസ്ഥാനത്തെ വിവിധ ഭാഗങ്ങളില്‍ വെള്ളപ്പൊക്കവും നാശനഷ്ടങ്ങളുമുണ്ടായി. മീന്‍ പിടിക്കുന്നതിനിടെ ഒഴുക്കിലകപ്പെട്ട കോട്ടയം ഓണംതുരുത്ത് മങ്ങാട്ടുകുഴി സ്വദേശി വിമോദ്കുമാറിന്റെ മൃതദേഹം കണ്ടെത്തി. തലസ്ഥാന ജില്ലയിലെ നെടുമങ്ങാട്ട് പലയിടത്തും വെള്ളം കയറി.

ജനങ്ങള്‍ ജാഗ്രത പുലര്‍ത്തേണ്ടതാണ്. മലവെള്ളപ്പാച്ചിലും മിന്നല്‍ പ്രളയവും സൃഷ്ടിച്ചേക്കാം. മണ്ണിടിച്ചിലും ഉരുള്‍പൊട്ടലുമുണ്ടാകാം. ശക്തമായ കാറ്റിനും സാദ്ധ്യതയുണ്ട്. 223 പേരെ മാറ്റി താമസിപ്പിച്ചിട്ടുണ്ടെന്നും മുഖ്യമന്ത്രി പിണറായി വിജയന്‍ പറഞ്ഞു.