ഇടുക്കിയില്‍ വീണ്ടും ഉടക്ക്‌... സീറ്റ് വിഭജനം പൂര്‍ത്തിയായി, ഇടുക്കി കോണ്‍ഗ്രസിന്‌, പ്രതിഷേധവുമായി ഫ്രാന്സിസ് ജോര്ജ് ബിഷപ്പുമായി കൂടിക്കാഴ്ച നടത്തി
യുഡിഎഫില്‍ സിറ്റ്‌ വിഭജനം പൂര്‍ത്തിയായതായി കെപിസിസി അധ്യക്ഷന്‍ വിഎം സുധീരന്‍ പ്രഖ്യാപിച്ചതോടെ കേരള കോണ്‍ഗ്രസിലെ ജോസഫ്‌ വിഭാഗം പ്രതിഷേധവുമായി രംഗത്തെത്തി. ജോസഫ്‌ വിഭാഗത്തിന്റെ പ്രതിനിധിയായി ഫ്രാന്സിസ് ജോര്ജ് ഇടുക്കി ബിഷപ്പ്‌ മാര്‍ മാത്യു ആനിക്കുഴിക്കാട്ടിലുമായി കൂടിക്കാഴ്ച നടത്തി. ഇന്ന് രാവിലെ ഒന്‍പതരയോടെയാണ്‌ കൂടിക്കാഴ്ച നടത്തിയത്‌. ഇടുക്കി ലോക്‌സഭാ സീറ്റില്‍ മത്സരിക്കുന്നത്‌ സംബന്ധിച്ച ചര്‍ച്ചകള്‍ക്കാണ്‌ കൂടിക്കാഴ്‌ചയെന്നാണ്‌ സൂചന.
ഹൈറേഞ്ച്‌ സംരക്ഷണ സമിതി സ്വന്തം സ്ഥാനാര്‍ത്ഥിയെ ഇടുക്കിയില്‍ നിര്‍ത്തുമെന്ന പശ്ചാത്തലത്തിലാണ്‌ ഈ കൂടിക്കാഴ്‌ചയെന്നാണ്‌ കരുതുന്നത്‌.
ഇടുക്കിയില്‍ സീറ്റ് ലഭിക്കാത്തതില്‍ പ്രതിഷേധിച്ച്‌ ആന്റണി രാജുവും രംഗത്തെത്തി. ഇടുക്കി സീറ്റ് വിട്ടുനല്‍കില്ലെന്ന കോണ്‍ഗ്രസ് നിലപാട് ശരിയല്ലെന്ന് ആന്റണി രാജു പറഞ്ഞു. സിറ്റിംഗ് സീറ്റ് നല്‍കില്ലെന്ന വാദം ആര്‍എസ്‌പി മുന്നണിയില്‍ വന്നതോടെ പൊളിഞ്ഞെന്നും അദ്ദഹം പറഞ്ഞു.
ഇടുക്കി സീറ്റില്‍ വിജയിക്കാന്‍ അനുയോജ്യന്‍ ഫ്രാന്സിസ് ജോര്ജ് തന്നെയെന്ന് പി.സി ജോര്ജ് പ്രതികരിച്ചു. ഹൈക്കമാന്റുമായുള്ള ചര്‍ച്ചയ്ക്ക് ശേഷം തീരുമാനം ഉണ്ടാകുമെന്നാണ് പ്രതീക്ഷ. തങ്ങളോട് ആലോചിക്കാതെ ഇടുക്കി സീറ്റില്‍ കോണ്‍ഗ്രസ് സ്ഥാനാര്‍ത്ഥികളെ പ്രഖ്യാപിച്ചതില്‍ ദുഃഖമുണ്ടെന്നും പി.സി ജോര്ജ്.
അതേസമയം കോണ്‍ഗ്രസ് സ്ഥാനാര്‍ത്ഥി പട്ടിക നാളെ പ്രഖ്യാപിക്കുമെന്നും ആര്‍എസ്‌പിയുടെ യുഡിഎഫ് പ്രവേശനം സോണിയാഗാന്ധിയെ അറിയിച്ചതായും വി എം സുധീരന്‍ ഡല്‍ഹിയില്‍ പറഞ്ഞു. കോണ്‍ഗ്രസ് സ്ഥാനാര്‍ത്ഥി പട്ടിക സംബന്ധിച്ച് അന്തിമ ചര്‍ച്ചകള്‍ക്കായാണ് വി എം സുധീരനും മുഖ്യമന്ത്രി ഉമ്മന്‍ചാണ്ടിയും ഡല്‍ഹിയിലെത്തിയത്. ഇരുവരും സോണിയാഗാന്ധിയുമായി കൂടിക്കാഴ്ച നടത്തി. ആര്‍എസ്‌പിയുടെ യുഡിഎഫ് പ്രവേശത്തിന് ഹൈക്കമാന്റ് അംഗീകാരം നല്‍കിയതായി സുധീരന്‍ പറഞ്ഞു. യുഡിഎഫിന്റെ സാധ്യതാ സ്ഥാനാര്‍ത്ഥി പട്ടിക കേന്ദ്ര സ്‌ക്രീനിംഗ് കമ്മിറ്റിക്ക് കൈമാറി. ഹൈക്കമാന്റുമായുള്ള ചര്‍ച്ചകള്‍ പൂര്‍ത്തിയാക്കിയ ശേഷം പട്ടിക നാളെ പ്രഖ്യാപിക്കും.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
