പ്രണയ വിവാഹത്തിന് പിന്നലെ മണിക്കൂറുകൾക്ക് ശേഷം ആൺകുഞ്ഞിന് ജന്മം നൽകി വധു. യുപിയിലെ സംഭാലിലാണ് സംഭവം. ഒന്നിപ്പിക്കാൻ മുൻകൈ എടുത്തത് പഞ്ചായത്തായിരുന്നു. പെൺകുട്ടിയുടെ വീട്ടുകാർ പഞ്ചായത്ത് തീരുമാനത്തിന് എതിരായിരുന്നെങ്കിലും പിന്നീട് പഞ്ചായത്ത് തീരുമാനം അംഗീകരിക്കേണ്ടി വന്നു. മുസ്ലീം ആചാരപ്രകാരമായിരുന്നു പ്രണയ ജോഡികളുടെ വിവാഹം. അസ്മോലി പൊലീസ് സ്റ്റേഷൻ പരിധിയിലെ പെൺകുട്ടി കഴിഞ്ഞ കുറേ വർഷങ്ങളായി ഗ്രാമത്തിലെ യുവാവുമായി പ്രണയത്തിലായിരുന്നു.

ഈ ബന്ധം അറിഞ്ഞതോടെ പെൺകുട്ടിയെ പുറത്തിറങ്ങുന്നത് വിലക്കി. എന്നാൽ ഈ നിയന്ത്രണങ്ങൾക്കിടയിലും പ്രണയ ജോഡികൾ തമ്മിൽ കണ്ടുമുട്ടുകയും പലതവണ ശാരീരിക ബന്ധത്തിലേർപ്പെട്ടതായും പോലീസ് പറയുന്നു. ശനിയാഴ്ച രാവിലെ കാമുകന്റെ വീട്ടിലെത്തിയ പെൺകുട്ടി വീടിനുള്ളിൽ കയറി വാതിൽ അകത്ത് നിന്ന് അടച്ചു. വിവരമറിഞ്ഞ് യുവാവിന്റെ വീടിന് പുറത്ത് പെൺകുട്ടിയുടെ കുടുംബാംഗങ്ങളും ഗ്രാമത്തിലെ ജനങ്ങളും തടിച്ചുകൂടി. ഈ വിവരം പൊലീസിനെയും അറിയിച്ചു. പൊലീസ് ഉദ്യോഗസ്ഥരും സ്ഥലത്തെത്തി. പൊലീസ് യുവാവിന്റെ വീടിന്റെ വാതിൽ തുറന്നെങ്കിലും കാമുകന്റെ വീട്ടിൽ നിന്ന് പുറത്തിറങ്ങാൻ പെൺകുട്ടി തയ്യാറായില്ല.

പൊലീസ് പെൺകുട്ടിയോട് കാര്യങ്ങൾ വിശദീകരിച്ച് യുവാവിനെയും ഇരുവശത്തുമുള്ള ആളുകളെയും മദൻ ചൗക്കിയിലേക്ക് വിളിച്ചുവരുത്തി. പൊലീസ് ഔട് പോസ്റ്റിൽ ഇരുകൂട്ടരും തമ്മിൽ ധാരണയുണ്ടാക്കിയ ശേഷം ഇരുവരുടെയും വിവാഹം ഉറപ്പിച്ചു. അതിനുശേഷം ഇരുവരും വിവാഹിതരായി. വിവാഹം കഴിഞ്ഞ് മൂന്ന് മണിക്കൂറിന് ശേഷം പെൺകുട്ടിക്ക് വയറുവേദന അനുഭവപ്പെട്ടു. തുടർന്ന് വീട്ടുകാർ പെൺകുട്ടിയെ അസ്മോലി കമ്യൂണിറ്റി ഹെൽത് സെന്ററിലെത്തിച്ചു. അവിടെ വച്ച് പെൺകുട്ടി ഒരു ആൺകുഞ്ഞിന് ജന്മം നൽകുകയും ചെയ്തു.