എൻഎസ്എസിനെതിരെ തിരിഞ്ഞ് സിപിഐഎം നേതാക്കൾ രംഗത്തെത്തി. ജി. സുകുമാരൻ നായരുടെ രാഷ്ട്രീയ താത്പര്യം തുറന്നു കാണിക്കുമെന്നും എൻ.എസ്.എസ് ജനറൽ സെക്രട്ടറി സുകുമാരൻ നായരുടെ പ്രസ്താവന നായർ സമൂഹം പോലും അംഗീകരിക്കില്ലെന്നും സിപിഐഎം സംസ്ഥാന സെക്രട്ടറി എ. വിജയരാഘവൻ പറഞ്ഞു.

ജനങ്ങൾ ഭരണമാറ്റം ആഗ്രഹിക്കുന്നു എന്ന സുകുമാരൻ നായരുടെ പ്രസ്താവനയാണ് രാഷ്ട്രീയത്തിൽ ഇപ്പോൾ ആളികത്തുന്നത്. രാഷ്ട്രീയ നേതാവിനെ പോലെയാണ് സുകുമാരൻ നായർ പ്രസ്താവനയിറക്കിയതെന്നും അതിന് പിന്നിലെ രാഷ്ട്രീയ താത്പര്യം തുറന്നു കാണിക്കുമെന്നും വിജയരാഘവൻ പറഞ്ഞു.

ജി. സുകുമാരൻ നായർ കോൺഗ്രസുകാരനാണെന്നായിരുന്നു എന്നാണ് മന്ത്രി എം. എം മണിയുടെ പ്രതികരണം. എൻഎസ്എസിനെ വിരട്ടാൻ നോക്കണ്ടെന്നും എൻഎസ്എസിന് അവരുടെ നിലപാട് ഉണ്ടെന്നും പ്രതിപക്ഷ നേതാവ് രമേശ് ചെന്നിത്തല വ്യക്തമാക്കി.

എൻ.എസ്.എസ് നേതാക്കളെ ഭീഷണിപ്പെടുത്തുന്നത് സിപിഐഎം നേതാക്കൾ അവസാനിപ്പിക്കണമെന്ന് ബിജെപി ദേശീയ സമിതി അംഗം പി. കെ കൃഷ്ണദാസും പ്രതികരിച്ചു.