ഓസ്ട്രേലിയന് താരം മാക്സ്വെല്ലിന്റെ വധു ഇന്ത്യന്-തമിഴ് വംശജ
ഓസ്ട്രേലിയന് ക്രിക്കറ്റ് താരം ഗ്ലെന് മാക്സ്വെല്, തന്റെ വിവാഹ നിശ്ചയം കഴിഞ്ഞതായി സമൂഹമാധ്യമങ്ങളിലൂടെ ആരാധകരെ അറിയിച്ചു. 2017 മുതല് പ്രണയത്തിലായിരുന്ന ഇന്ത്യന് വംശജയായ വിനി രാമനാണ് വധു. തമിഴ്നാട്ടില് വേരുകളുള്ള വിനി രാമന് ജനിച്ചതും വളര്ന്നതും ഓസ്ട്രേലിയയിലാണ്. ഓസ്ട്രേലിയയില് ഫാര്മസിസ്റ്റായി ജോലി നോക്കുന്ന വിനി രാമനും ഈ ചിത്രം പങ്കുവച്ചിട്ടുണ്ട്.
വിനിയോടൊപ്പമുള്ള ചിത്രത്തോടൊപ്പം വിവാഹ വാര്ത്ത മാക്സ്വെല് തന്റെ ഇന്സ്റ്റഗ്രാം അക്കൗണ്ടിലൂടെയാണ് ആരാധകരെ അറിയിച്ചത്. മാക്സ്വെല് അണിയിച്ച മോതിരം കാണിച്ചാണ് വിനി സെല്ഫിയ്ക്കായി പോസ് ചെയ്തത്. വിനിയും ഈ ചിത്രം ഇന്സ്റ്റഗ്രാമില് പങ്കുവെച്ചിട്ടുണ്ട്. ഒരാഴ്ച്ച മുമ്പ് മാക്സി തന്നെ പ്രൊപ്പോസ് ചെയ്തെന്നും യെസ് എന്ന് ഉത്തരം നല്കിയെന്നും വിനി ചിത്രത്തോടൊപ്പമുള്ള കുറിപ്പില് പറയുന്നു. ഒരാഴ്ച്ച മുമ്പ് കഴിഞ്ഞിട്ട് ഞങ്ങള് ഇപ്പോഴാണല്ലോ അറിഞ്ഞത് എന്നായിരുന്നു മാക്സ്വെല്ലിന്റെ ഐ.പി.എല് ടീമായ കിങ്സ് ഇലവന് പഞ്ചാബ് ഇതിന് നല്കിയ കമന്റ്.
ബിഗ് ബാഷ് ലീഗില് മാക്സ്വെലിന്റെ ടീമായ മെല്ബണ് സ്റ്റാര്സിന്റെ ഒരു പരിപാടിക്കിടെയാണ് മാക്സ് വെല്ലും വിനിയും കണ്ടുമുട്ടിയത്. ഐപിഎല്ലില് ഇത്തവണ കിങ്സ് ഇലവന് പഞ്ചാബാണ് മാക്സ്വെലിനെ സ്വന്തമാക്കിയത്.ഓസീസ് ടീമിലെ സഹതാരമായ ക്രിസ് ലിന് ഉള്പ്പെടെയുള്ളവര് മാക്സ്വെലിനും വിനിക്കും ആശംസകളുമായി രംഗത്തെത്തി.
മുപ്പത്തൊന്നുകാരനായ മാക്സ്വെല് ഓസ്ട്രേലിയയ്ക്കായി ഏഴു ടെസ്റ്റുകളും 110 ഏകദിനങ്ങളും 61 ട്വന്റി20 മത്സരങ്ങളും കളിച്ചിട്ടുണ്ട്. മൂന്നു ഫോര്മാറ്റിലും സെഞ്ചുറി നേടിയിട്ടുള്ള താരങ്ങളിലൊരാള് കൂടിയാണ്.
ഇന്ത്യക്കാരിയെ പ്രണയിച്ചു വിവാഹം കഴിക്കുന്ന ആദ്യത്തെ ഓസീസ് താരമല്ല മാക്സ്വെല്. മുന് ഓസീസ് താരം ഷോണ് ടെയ്റ്റ് ഇന്ത്യന് മോഡലായ മഷൂം സിന്ഹയെ വിവാഹം ചെയ്തത് 2014-ലാണ്. പാക്കിസ്ഥാന് താരങ്ങളായ ശുഐബ് മാലിക്ക്, മൊഹ്സിന് ഖാന്, ശ്രീലങ്കന് താരം മുത്തയ്യ മുരളീധരന്, ന്യൂസീലന്ഡ് താരം ഗ്ലെന് ടേണര് എന്നിവരെല്ലാം ഇന്ത്യന് യുവതികളെയാണ് വിവാഹം കഴിച്ചത്. പാക്കിസ്ഥാന് ക്രിക്കറ്റ് താരം ഹസന് അലി അടുത്തിടെയാണ് ഇന്ത്യന് യുവതിയെ വിവാഹം ചെയ്തത്.
https://www.facebook.com/Malayalivartha