നാഗ്‌പൂരില്‍ ഇന്ത്യക്ക്‌ വമ്പന്‍ ജയം
നാഗ്‌പൂരില്‍ നടന്ന ഇന്ത്യ-ഓസ്‌ട്രേലിയ ആറാം ഏകദിനത്തില്‍ ഇന്ത്യക്ക്‌ വമ്പന്‍ ജയം. വൈസ് ക്യാപ്‌റ്റന്‍ വിരാട്‌ കോഹ്‌ലിയുടേയും ശിഖര്‍ ധവാന്റേയും സെഞ്ചുറിയുടെ മികവിലാണ്‌ ഇന്ത്യ മത്സരം നേടിയത്‌. ആകെ നാലു സെഞ്ചുറികളാണ്‌ മത്സരത്തില്‍ പിറന്നത്‌. ആദ്യം ബാറ്റു ചെയ്‌ത ഓസ്‌ട്രേലിയക്കുവേണ്ടി ക്യാപ്‌റ്റന്‍ ജോണ്‍ ബെയ്‌ലിയും(156), വാട്‌സനും(102) സെഞ്ചുറികള്‍ നേടിയിരുന്നു.
രണ്ടു സെഞ്ചുറികളുടെ ബലത്തില്‍ ഓസിസ്‌ 350 റണ്‍സ്‌ നേടി. എന്നാല്‍ തുടര്‍ന്ന്‌ ബാറ്റുചെയ്‌ത ഇന്ത്യക്കുവേണ്ടി ഓപ്പണര്‍മാരായ ശിഖര്‍ ധവാനും രോഹിത് ശര്‍മ്മയും 178 റണ്‍സിന്റെ കൂട്ടുകെട്ടുണ്ടാക്കി. 79 റണ്‍സെടുത്ത്‌ മടങ്ങിയ രോഹിത്തിന്‌ പകരക്കാരനായി എത്തിയ വൈസ് ക്യാപ്‌റ്റന്‍ വിരാട്‌ കോഹ്‌ലി ധവാനുമായി ചേര്‍ന്ന്‌ പോരാടി. ധവാന്‍ 100 റണ്‍സ്‌ എടുത്ത്‌ പുറത്തായപ്പോള്‍ എത്തിയ റെയ്‌നക്ക്‌ കാര്യമായി സംഭാവനകള്‍ നല്‍കാന്‍ കഴിഞ്ഞില്ല. പിന്നീട്‌ എത്തിയ ക്യാപ്‌റ്റന്‍ ധോണി കോഹ്‌ലിക്ക്‌ നല്ല പിന്തുണ നല്‍കി.
കോഹ്‌ലി പുറത്താകാതെ 66 പന്തില്‍ 115 റണ്‍സ്‌ നേടി. കോഹ്‌ലിയാണ്‌ കളിയിലെ കേമന്‍. ഇതോടെ പരമ്പരയില്‍ ഇരുടീമുകളും സമനിലയിലെത്തി(2-2). ഇനി ഒരു മത്സരം കൂടി പരമ്പരയില്‍ അവശേഷിക്കുന്നുണ്ട്‌.
https://www.facebook.com/Malayalivartha
