കൊലിണ്ട ഗര്‍ബാര്‍ കെട്രോവിക്ക്. പേര് വഴങ്ങാന്‍ ബുദ്ധിമുട്ടെങ്കിലും വാര്‍ത്തകളില്‍ നിറഞ്ഞത് പ്രസിഡന്റ് താരമായി. വിദേശീയരില്‍ നിന്നും നമുക്കെന്തെല്ലാം പഠിക്കാനുണ്ടെന്ന് കണ്ടുപഠിക്കുക തന്നെ ചെയ്യണം. ഒരു ജനതയുടെ ഹൃദയത്തില്‍ കയറുക എന്നാല്‍ അവരില്‍ ഒരാളായി മാറുക എന്നതാണ്. ടീമിനെ ആവേശത്തിലാക്കാന്‍ ടീമിന്റെ ജഴ്‌സി അണിഞ്ഞാണ് അവര്‍ എത്തിയത്. ക്രൊയേഷ്യന്‍ പ്രസിഡന്റ് കൊലിണ്ട ചെയ്യുന്നത് അതാണ്. ഒരു പക്ഷെ ഈ ലോകകപ്പില്‍ ഏറ്റവും കൂടുതല്‍ ശ്രദ്ധ ആകര്‍ഷിച്ച വ്യക്തിത്വം അവര്‍ ആയിരിക്കണം. 
കടുത്ത മഴയെ അവഗണിച്ചു ഓരോ കളിക്കാരനോടും കുശലം പറഞ്ഞു, കെട്ടിപ്പിടിച്ചു ആശ്വസിപ്പിച്ച കോലിണ്ട യെ പോലെ ഒരു നേതാവിനെ നമ്മുടെ രാജ്യത്തോ സംസ്ഥാനത്തോ കാണാന്‍ പറ്റുമോ? ധാര്‍ഷ്ട്യം ആണ് നമ്മുടെ പല നേതാക്കളുടെയും മുഖ മുദ്ര. ചിരിയും, കുശലം പറച്ചിലും ഇലക്ഷന്‍ കഴിയുന്നതോടെ തീരും. നമുക്കെല്ലാം അവരില്‍ നിന്നും ധാരാളം പഠിക്കാനുണ്ട്. സഹ പ്രവര്‍ത്തകരോട് എങ്ങിനെ പെരുമാറണം എന്നും അവരെ എങ്ങിനെ ഹൃദയത്തോട് ചേര്‍ത്ത് നിര്‍ത്തണം എന്നും കോലിണ്ടയുടെ പെരുമാറ്റത്തില്‍ നിന്നും പഠിക്കാം. 
അതു മാത്രമല്ല ലോകകപ്പ് കാണുവാനായി ക്രൊയേഷ്യയുടെ തലസ്ഥാനം ആയ സെഗേര്‍ബില്‍ നിന്നും റഷ്യ യിലേക്ക് അവര്‍ പറന്നത്, 'എക്കോണമി ക്ലാസ്സില്‍' ആണത്രെ. കൂടാതെ തനിക്ക് അര്‍ഹതപ്പെട്ട സീറ്റ് ഒഴിവാക്കി സാധാരണ ഫുട്‌ബോള്‍ പ്രേമികളുടെ ഇടയില്‍ ഇരുന്നാണ് കളി കണ്ടത് എന്നും പറയുന്നു.
ഇതിനിടയില്‍ ശ്രദ്ധിച്ച വേറെ ഒരു കാര്യം ഫ്രഞ്ച് കോച്ച് ഡൈഡര്‍ തന്റെ ടീം അംഗങ്ങളോടുള്ള ഹൃദയ ബന്ധം ആണ്. എത്ര സ്‌നേഹനിര്‍ഭരം ആയാണ് അദ്ദേഹം ടീം അംഗങ്ങളെ അഭിനന്ദിക്കുന്നതും കെട്ടിപ്പിടിക്കുന്നതും. ആഹ്ലാദം അതിന്റെ ഉച്ച സ്ഥായിയില്‍ എത്തുമ്പോള്‍ ടീം അംഗങ്ങള്‍ അദ്ദേഹത്തെ ഉയര്‍ത്തി വായുവിലേക്ക് എറിയുക പോലും ഉണ്ടായി.

എങ്ങിനെ ഒരു ടീം അംഗങ്ങളെ ഹൃദയത്തോട് ചേര്‍ത്തു പിടിക്കാം എന്നും നമുക്ക് ഡൈഡറി ല്‍ നിന്നും പഠിക്കാം. റഷ്യന്‍ പ്രസിഡന്റു പോലും മഴയത്ത് കുട ചൂടാതെ കളിക്കാരെ അഭിനന്ദിക്കുന്നതും കണ്ടുപഠിക്കേണ്ടതാണ്. പാശ്ചാത്യ സംസ്‌കാരത്തില്‍ നിന്നും നമുക്ക് ധാരാളം പഠിക്കാനുണ്ട്, പ്രത്യേകിച്ചും സ്‌നേഹം, കരുണ, സൗഹൃദം, മാനവികത എന്നിവ. അവിടെ കാപട്യം കുറവ് ഇവിടെ അതുമാത്രവും അത്രയേ ഉള്ളൂ വ്യത്യാസം. നമ്മുടെ നേതാക്കള്‍ ഒക്കെ ഇവരെ മാതൃക ആക്കിയിരുന്നെങ്കില്‍? എന്നേ നാടുനന്നായേനെ

.