ഇംഗ്ലീഷ് പ്രീമിയര്‍ ലീഗില്‍ ഒന്നാം സ്ഥാനം തിരിച്ചുപിടിച്ച് മാഞ്ചസ്റ്റര്‍ സിറ്റി. നിര്‍ണായക മത്സരത്തില്‍ ടോട്ടനം സ്പര്‍സിനെ പരാജയപ്പെടുത്തിയതോടെയാണ് സിറ്റി പോയിന്റ് ടേബിളില്‍ ആഴ്സണലിനെ മറികടന്ന് ഒന്നാം സ്ഥാനത്ത് എത്തിയത്. മറുപടിയില്ലാത്ത രണ്ടു ഗോളിനായിരുന്നു സിറ്റിയുടെ ജയം.

കളിയുടെ രണ്ടാം പകുതിയിലാണ് ആദ്യ ഗോള്‍ പിറന്നത്. 50-ാം മിനുറ്റില്‍ ഡി ബ്രൂയ്ന്‍ പാസില്‍ ഹാലണ്ടാണ് ഗോള്‍ നേടിയത്. 90-ാം മിനുറ്റില്‍ കിട്ടിയ പെനാല്‍റ്റി അവസരത്തിലൂടെ സിറ്റി ഗോള്‍ നേട്ടം രണ്ടാക്കി. ലീഗില്‍ സിറ്റിക്ക് ഇനി വെസ്റ്റ് ഹാമിനെതിരെയും ആഴ്സണലിന് എവര്‍ട്ടണിനെതിരെയുമാണ് മത്സരം.

ഈ ജയത്തോടെ മാഞ്ചസ്റ്റര്‍ സിറ്റി ലീഗില്‍ 37 മത്സരങ്ങളില്‍ നിന്ന് 88 പോയിന്റില്‍ എത്തി. ആഴ്സണല്‍ 86 പോയിന്റുമായി രണ്ടാമതാണ്.മാഞ്ചസ്റ്റര്‍ സിറ്റി ലക്ഷ്യമിടുന്നത് തങ്ങളുടെ എട്ടാം കിരീടമാണ്. തുടര്‍ച്ചയായ നാലാം കിരീടവും. എന്നാല്‍ 2003-04 സീസണില്‍ അവസാനമായി കിരീടം നേടിയ ആഴ്സണലിന് പിന്നീട് ഒരിക്കലും കിരീടം നേടാന്‍ കഴിഞ്ഞിട്ടില്ല.