ഇന്ത്യൻ സൂപ്പർ ലീഗിന്റെ (ഐഎസ്എൽ) പുതിയ സീസണിലെ ഉദ്ഘാടന മത്സരത്തിൽ ബെംഗളൂരു എഫ്സിക്ക് ആവേശകരമായ വിജയം. ബെംഗളൂരുവിലെ ശ്രീകണ്ഠീരവ സ്റ്റേഡിയത്തിൽ നടന്ന മത്സരത്തിൽ സ്പോർട്ടിങ് ക്ലബ്ബ് ഡൽഹിക്കെതിരേ ഒരു ഗോളിന് പിന്നിൽ നിന്ന ശേഷമാണ് ബെംഗളൂരു 3-2ന് തിരിച്ചടിച്ച് വിജയം കരസ്ഥമാക്കിയത്. 10,600-ഓളം വരുന്ന കാണികളെ സാക്ഷിയാക്കി മത്സരത്തിന്റെ 89-ാം മിനിറ്റിൽ ഡച്ച് പ്രതിരോധ താരം മെനോ കോച്ച് നേടിയ തകർപ്പൻ ഹെഡ്ഡർ ഗോളാണ് ബെംഗളൂരുവിന് അവിസ്മരണീയ വിജയമൊരുക്കിയത്.

മത്സരത്തിൽ ബെംഗളൂരു എഫ്സിയാണ് ആദ്യം മുന്നിലെത്തിയത്. 22-ാം മിനിറ്റിൽ സ്പാനിഷ് ഫോർവേഡ് ബോർഹ മാർട്ടിനെസ് ഇടങ്കാലൻ ഷോട്ടിലൂടെ ഡൽഹി ഗോൾകീപ്പർ നോറ ഫെർണാണ്ടസിനെ മറികടന്ന് തന്റെ അരങ്ങേറ്റ മത്സരത്തിൽ ബെംഗളൂരുവിന് ലീഡ് നൽകി.

എന്നാൽ 26-ാം മിനിറ്റിൽ ലാൽറിൻലിയാന ഹനാമ്‌തെയുടെ കൃത്യതയാർന്ന പാസിൽ നിന്ന് റോഡ്രിഗ്വീഞ്ഞോ ഡൽഹിയെ ഒപ്പമെത്തിച്ചു.
തുടർന്ന് 32-ാം മിനിറ്റിൽ ഡൽഹിയുടെ കൊളംബിയൻ താരം യുവാൻ പെന ബെംഗളൂരു താരം ചിംഗ്ലെൻസന സിങ്ങിനെ മറികടന്ന് ബോക്സിലേക്ക് നൽകിയ ക്രോസ് തടയാനായി ശ്രമിച്ച മെനോ കോച്ചിന്റെ കാലിൽ തട്ടി പന്ത് സ്വന്തം വലയിൽ കയറി. സെൽഫ് ഗോളിൽ ഡൽഹി മുന്നിൽ (2-1).
എന്നാൽ രണ്ടാം പകുതിയിൽ ബെംഗളൂരു എഫ്സി ആക്രമണം ശക്തമാക്കുകയും ചെയ്തു. മത്സരത്തിലുടനീളം ഡൽഹി ഗോൾമുഖത്തേക്ക് ബെംഗളൂരു 22 ഷോട്ടുകളാണ് പായിച്ചത്.

75-ാം മിനിറ്റിൽ മിഹൈലോ പെറോവിച്ചിന്റെ പാസ് സ്വീകരിച്ച് ബോർഹ മാർട്ടിനെസ് മറ്റൊരു ഇടങ്കാലൻ ഷോട്ടിലൂടെ തന്റെ രണ്ടാം ഗോൾ കുറിച്ചതോടെ ബെംഗളൂരു ഒപ്പമെത്തി.പിന്നാലെ വിജയം ലക്ഷ്യമിട്ട് ബെംഗളൂരു നിരന്തരം ഡൽഹി ബോക്‌സിലേക്ക് ഇരച്ചുകയറി. റയാൻ വില്യംസിനും പെറോവിച്ചിനും ലഭിച്ച അവസരങ്ങൾ നഷ്ടമായെങ്കിലും 28-കാരനായ ഗോവൻ ഗോൾകീപ്പർ നോറ ഫെർണാണ്ടസ് മികച്ച സേവുകളിലൂടെ ഡൽഹിയുടെ രക്ഷകനായി. പ്രത്യേകിച്ച് 85-ാം മിനിറ്റിൽ റയാൻ വില്യംസിന്റെ തൊട്ടടുത്തു നിന്നുള്ള ഷോട്ട് നോറ തടഞ്ഞത് ശ്രദ്ധേയമായി. എന്നാൽ മത്സരത്തിന്റെ 89-ാം മിനിറ്റിൽ മെനോ കോച്ച് തകർപ്പൻ ഹെഡ്ഡറിലൂടെ പന്ത് വലയിലാക്കി ബെംഗളൂരുവിന് വിജയം സമ്മാനിക്കുകയും ചെയ്തു.