അണ്ടർ 17 ലോകകപ്പിൽ ബ്രസീലിന് മൂന്നാം സ്ഥാനം ; വിജയം എതിരില്ലാത്ത രണ്ടു ഗോളുകൾക്ക്
അണ്ടർ 17 ലോകകപ്പിൽ മൂന്നാം സ്ഥാനക്കാരായി ബ്രസീൽ മടങ്ങി. ലൂസേഴ്സ് ഫൈനലിൽ മാലിയെ എതിരില്ലാത്ത രണ്ടു ഗോളുകൾക്കു തകർത്താണു മഞ്ഞപ്പടയുടെ മിന്നും വിജയം.
മത്സരത്തിന്റെ ആരംഭം മുതൽ മാലിയുടെ ആക്രമണമാണു ഗ്രൗണ്ടിൽ പ്രകടമായത്. എന്നാൽ ആദ്യ പകുതിയിൽ ഗോൾ ഒഴിഞ്ഞുനിന്നു. രണ്ടാം പകുതിയിൽ, 55-ാം മിനിറ്റിൽ ബ്രസീൽ ആദ്യ ഗോൾ നേടി. മാലി പ്രതിരോധത്തിലെ പിഴവ് മുതലെടുത്ത് ബ്രസീൽ താരം അലൻ തൊടുത്ത ഷോട്ട് ഗോൾകീപ്പറുടെ കൈയിൽനിന്നു വഴുതി പോസ്റ്റിലേക്ക് ഉരുണ്ടുകയറുന്നത് അവിശ്വാസത്തോടെയാണ് മാലി കളിക്കാർ നോക്കിനിന്നത്.
ഒരു ഗോൾ വീണതോടെ സമനിലയ്ക്കായി ഇരച്ചുകയറിയ മാലിക്ക് പക്ഷേ ഫിനിഷിംഗിലെ പോരായ്മകൾ തിരിച്ചടിയായി. കളി അവസാനിക്കാൻ രണ്ടു മിനിറ്റ് ബാക്കിനിൽക്കെ ബ്രസീൽ വീണ്ടും ലക്ഷ്യംകണ്ടു. പകരക്കാരനായി ഗ്രൗണ്ടിലെത്തിയ യൂറി ആൽബർട്ടോയുടെ വകയായിരുന്നു ഗോൾ. ഇതോടെ അണ്ടർ 17 ലോകകപ്പിൽ മൂന്നാം സ്ഥാനം ബ്രസീൽ ഉറപ്പിച്ചു.
https://www.facebook.com/Malayalivartha