കേരള ബ്ലാസ്റ്റേഴ്സിന്റെ സ്പെയിനിലെ പ്രീസീസണ്‍ പരിശീലനത്തിന് സമാപനം. ഒരു മാസം നീണ്ട പരിശീലനത്തിനൊടുവില്‍ ശനിയാഴ്ച്ച രാത്രി ബ്ലാസ്റ്റേഴ്സ് ടീം ഇന്ത്യയില്‍ തിരിച്ചെത്തും. ഡല്‍ഹിയിലാണ് ബ്ലാസ്റ്റേഴ്സ് ടീം വിമാനമിറങ്ങുക. ഇനി പരിശീലനത്തിന്റെ ഭാഗമായി ബ്ലാസ്റ്റേഴ്സ് ഇന്ത്യന്‍ ക്ലബുകളുമായിട്ടാണ് ഏറ്റുമുട്ടുക. പ്രമുഖ ക്ലബുകളുമായി ഇതുസംബന്ധിച്ച്‌ ചര്‍ച്ചകള്‍ നടക്കുന്നുണ്ടെന്നാണ് റിപ്പോര്‍ട്ട്.

ഹൈദരാബാദിലെ പരിശീലന ക്യാമ്പിന് ശേഷമാണ് ബ്ലാസ്റ്റേഴ്സ് സ്പെയിനിലേക്ക് വിമാനം കയറിയത്. സ്പെയിനിലെ മാര്‍ബലയില്‍ ഒരു മാസത്തോളമാണ് ബ്ലാസ്റ്റേഴ്സ് ടീം പരിശീലനം നടത്തിയത്. മുഖ്യ പരിശീലകന്‍ റെനെ മ്യൂളസ്റ്റീന്റെ നേതൃത്വത്തിലായിരുന്നു പരിശീലനം. നിരവധി സ്പാനിഷ് ടീമുകളുമായി ഈ കാലഘട്ടത്തില്‍ ബ്ലാസ്റ്റേഴ്സ് ഏറ്റുമുട്ടിയിരുന്നു. രണ്ട് വിജയങ്ങളും ഒരു സമനിലയും ഒരു തോല്‍വിയുമാണ് ബ്ലാസ്റ്റേഴ്സ് പ്രീസീസണിലെ പരിശീലന മത്സരത്തില്‍ സ്വന്തമാക്കിയത്.

സി.കെ വിനീത് ഉള്‍പ്പെടെ ഉള്ളവര്‍ ബ്ലാസ്റ്റേഴ്സിനായി പ്രീസീസണില്‍ ഗോള്‍ കണ്ടെത്തിയിരുന്നു. നവംബര്‍ 17നാണ് ഐഎസ്‌എല്‍ മത്സരങ്ങള്‍ക്ക് തുടക്കമാകുക. ആദ്യ മത്സരത്തില്‍ കേരള ബ്ലാസ്റ്റേഴ്സും അത്ലറ്റിക്കോ ഡി കൊല്‍ക്കത്തയും തമ്മിലാണ് പോരാട്ടം.