ഐ എസ് എൽ നാലാം സീസണിലെ ആദ്യ ജയം തേടി കേരള ബ്ലാസ്റ്റേഴ്‌സ് ഇറങ്ങുന്നു. കഴിഞ്ഞ മൽസരത്തിൽ എഫ്സി ഗോവയിൽ നിന്നേറ്റ വൻ തോൽവിയിൽ നിന്ന് കരകയറാനുള്ള ശ്രമത്തിലാണ് ബ്ലാസ്റ്റേഴ്‌സ്. പരിക്ക് മൂലം കളിക്കാതിരുന്ന വെസ് ബ്രൗണിന്റെ ഐ എസ് എൽ അരങ്ങേറ്റമാണ് ഇന്ന് കൊച്ചിയിൽ നടക്കുന്നത്. ചുവപ്പുകാർഡ് കണ്ടതിനാൽ ഗോവയ്ക്കെതിരായ മൽസരത്തിൽ പുറത്തിരുന്ന മലയാളി താരം സി.കെ. വിനീതും ഇന്ന് തിരിച്ചെത്തും.

വെസ് ബ്രൗൺ തിരിച്ചെത്തിയ സാഹചര്യത്തിൽ ഡിഫൻസീവ് മിഡ്ഫീൽഡറുടെ റോൾ കൈകാര്യം ചെയ്തിരുന്ന അരാത്ത ഇസൂമിയെ ബെഞ്ചിലേക്ക് മാറ്റി. കൂടാതെ സൂപ്പർ താരം ഇയാൻ ഹ്യൂമും പകരക്കാരുടെ ബെഞ്ചിലാണ്. എന്നാൽ മിഡ്ഫീൽഡർ സിയാം ഹംഗൽ ഇന്ന് ആദ്യ ഇലവനിൽ ഇടം നേടിയിട്ടുണ്ട്. നിലവിൽ പോയിന്റ് പട്ടികയിൽ എട്ടാമതാണ് ബ്ലാസ്റ്റേഴ്സ്.