തുടര്‍ച്ചയായ തിരിച്ചടികള്‍ക്ക് ശേഷം മുഖ്യപരിശീലകന്‍ രാജിവച്ചൊഴിഞ്ഞ സ്ഥാനത്ത് പുതിയ കോച്ചിനെ പ്രതിഷ്ഠിച്ച് പൂനെക്കെതിരെ കൊച്ചിയിലെ മൈതാനത്ത് കളിക്കാനിറങ്ങിയ കേരളാ ബ്ലാസ്‌റ്റേഴ്‌സിന് വീണ്ടും സമനിലക്കുരുക്ക്. ഒരു ഗോളിന് പിന്നില്‍ നിന്ന ആദ്യ പകുതിയ്ക്ക് ശേഷം 74 ആം മിനുട്ടിലാണ് സിഫിനോസിസിന്റെ ബൂട്ടില്‍ നിന്നാണ് ബ്ലാസ്‌റ്റേഴ്‌സിന് വേണ്ടി സമനില ഗോള്‍ നേടിയത്. മുപ്പതാം മിനുട്ടില്‍ മാര്‍സലീന്യോയാണ് പൂനെയ്ക്ക് വേണ്ടി ഗോള്‍ നേടിയത്. കളിമികവ് പുറത്തെടുക്കാനാവാതെ പോയ ബ്ലാസ്‌റ്റേഴ്‌സ് പ്രതിരോധ നിരയെ സമര്‍ദ്ദമായി കബളിപ്പിച്ചാണ് മാര്‍സലീന്യോ ഗോള്‍ നേടിയത്.

ഏറെ പ്രതീക്ഷകളോടെ മാഞ്ചസ്റ്റര്‍ യുണൈറ്റഡില്‍ നിന്നും എത്തിച്ച റെനെ മ്യൂളന്‍ സ്റ്റീനിനെ പാതിവഴിയില്‍ പറഞ്ഞുവിട്ട കേരള ബ്‌ളാസ്‌റ്റേഴ്‌സ് ഐ.എസ്.എല്‍ ആദ്യ സീസണിലെ തങ്ങളുടെ നായകനും കോച്ചുമായിരുന്ന ഇംഗ്‌ളീഷ് ഗോളി ഡേവിഡ് ജെയിംസിനെയാണ് പരിശീലകനായി തിരിച്ചുവിളിച്ചിരിക്കുന്നത്. കൊച്ചിയിലെ ഹോം ഗ്രൗണ്ടില്‍ പൂനെ സിറ്റിക്കെതിരെ ബൂട്ടുകെട്ടിയ ബ്‌ളാസ്‌റ്റേഴ്‌സ് പഴയ മാര്‍ക്വീ താരത്തിന് കീഴില്‍ പുതിയൊരു തുടക്കമിടാനുള്ള ശ്രമത്തിലായിരുന്നു. എന്നാല്‍ കളമറിഞ്ഞ് കളിച്ച പൂനെ മത്സരം സമനിലയിലൊതുക്കുകയായിരുന്നു.

സീസണിലെ ആദ്യ ഏഴ് മത്സരങ്ങളില്‍ ഒന്നുമാത്രം ജയിക്കാനായ ബ്‌ളാസ്‌റ്റേഴ്‌സ് പുതുവത്സത്തില്‍ ബംഗ്‌ളൂരു എഫ്.സിയോട് 3-1ന് തോറ്റതിന് പിന്നാലെ തന്നെ മ്യൂളന്‍ സ്റ്റീനിന്റെ പുറത്താകല്‍ സംബന്ധിച്ച് അവസാന തീരുമാനമെടുത്തിരുന്നു. എന്നാല്‍ ചൊവ്വാഴ്ച വൈകിട്ടോടെയാണ് ഔദ്യോഗിക പ്രഖ്യാപനമുണ്ടായത്. മ്യൂളന്‍സ്റ്റീനിനെ മാറ്റിയപ്പോള്‍തന്നെ ഡേവിഡ് ജെയിംസിനെ കോച്ചാക്കാനുള്ള നീക്കങ്ങളും തുടങ്ങിയിരുന്നു. അതിന്റെ ഭാഗമായി തിങ്കളാഴ്ച രാത്രിയോടെ കൊച്ചിയിലെത്തിയ ഡേവിഡ് ജെയിംസ് ഇന്നലെ പനമ്പള്ളി നഗറില്‍ നടന്ന ബ്‌ളാസ്‌റ്റേഴ്‌സിന്റെ പരിശീലനം വീക്ഷിക്കാനും എത്തിയിരുന്നു. എന്നാല്‍ ഡേവിഡ് ജെയിംസിനെ കോച്ചായി നിയമിക്കാനുള്ള ഔദ്യോഗിക നടപടിക്രമങ്ങള്‍ പൂര്‍ത്തിയാകാത്തതിനാല്‍ അദ്ദേഹം ഗ്രൗണ്ടില്‍ പരിശീലനത്തിന് ഒപ്പം ഇറങ്ങിയില്ല.