പിഎസ്ജിയുടെ സൂപ്പർ താരം നെയ്മർ സ്പാനിഷ് ക്ലബ്ബായ റയൽ മാഡ്രിഡിലേക്കെന്ന് സൂചന. ദേശീയ ടീമിലെ സഹകളിക്കാരനായ കുട്ടീഞ്ഞോ ഇത് സംബന്ധിച്ച വെളിപ്പെടുത്തൽ നടത്തിയെന്നാണ് റിപ്പോർട്ട്. ദേശീയ ടീമിനൊപ്പം സമയം ചെലവഴിക്കുമ്പോള്‍ തന്റെ അടുത്ത ലക്ഷ്യം മാഡ്രിഡാണെന്ന് നെയ്മര്‍ കുട്ടീഞ്ഞോയോട് പറഞ്ഞുവെന്ന് സ്പാനിഷ് മാധ്യമം ഡോണ്‍ ബാലണ്‍ റിപ്പോര്‍ട്ട് ചെയ്തു.

അടുത്തിടെയാണ് കുട്ടീഞ്ഞോ ബാഴ്‌സലോണയിൽ എത്തിയത്. സീസണിൽ മോശം ഫോമിൽ തുടരുന്ന റയലിലേക്ക് നെയ്മർ എത്തുമെന്ന സൂചനകൾ നേരത്തെ ഉണ്ടായിരുന്നു. പുതിയ വെളിപ്പെടുത്തലുകൾ ഈ സംശയങ്ങളെ സാധൂകരിക്കുന്നതാണ്. നെയ്മർ റയലിൽ എത്തിയാൽ തിരിച്ചടി നേരിടുന്നത് ബാർസയാണ്. ബദ്ധവൈരികളായ റയലിൽ ബാഴ്സയുടെ മുൻ താരമായ നെയ്മർ എത്തുന്നത് ആരാധകർക്കിടയിലും അസ്വാരസ്യങ്ങൾ ഉണ്ടാക്കും.

നേരത്തെ പരസ്യമായി തന്നെ റയൽ മാഡ്രിഡ് മാനേജ്മെന്റ് നെയ്മറെ മാഡ്രിഡിലേക്ക് ക്ഷണിച്ചിരുന്നു.സീസണിൽ സൂപ്പർ താരം ക്രിസ്റ്റ്യാനോ റൊണാൾഡോയും മോശം ഫോമിലാണ്. ഈ സാഹചര്യത്തിൽ മികച്ച ഫോമിലുള്ള നെയ്മറെ ടീമിൽ എത്തിക്കുന്നത് നേട്ടമാകും. റെക്കോർഡ് തുകയ്ക്കാണ് ബാഴ്സയിൽ നിന്ന് നെയ്മറെ പിഎസ്ജി സ്വന്തമാക്കിയത്. ഈ സൂപ്പർ താരത്തെ റയയിലെത്തിക്കാൻ തിരുമാനമാനിച്ചാൽ റെക്കോർഡ് തുകക്കായിരിക്കും കൈമാറ്റമെന്നുറപ്പ്.