കേരളാ ബ്ലാസ്റ്റേഴ്സിലേക്ക് തന്നെ തിരിച്ചു കൊണ്ടുവരണമെന്ന അപേക്ഷയുമായി അന്റോണിയോ ജര്‍മന്‍. ബ്ലാസ്റ്റേഴ്സിൽ കളിക്കാനുള്ള ആഗ്രഹം പ്രകടിപ്പിച്ച് താരം മുൻപും രംഗത്തെത്തിയിട്ടുണ്ട്. ട്വിറ്ററിലൂടെയാണ് ജർമൻ തന്റെ ആഗ്രഹം പ്രകടിപ്പിച്ചത്.

കഴിഞ്ഞ രണ്ട് സീസണുകളിലും ബ്ലാസ്റ്റേഴ്സിന്റെ മുന്നേറ്റ നിര താരമായിരുന്നു ജർമൻ. ബ്ലാസ്റ്റേഴ്‌സ് ആരാധകരുടെ പ്രിയപ്പെട്ട താരമായിരുന്ന ജർമനെ ഈ സീസണിൽ ബ്ലാസ്റ്റേഴ്‌സ് ടീമിലെടുത്തില്ല. നിലവില്‍ ഇംഗ്ലണ്ടിലെ നാഷണല്‍ സൗത്ത് ലീഗ് രണ്ടാം ഡിവിഷനിലെ ഹെമല്‍ ഹെംസ്റ്റഡിലാണ് ജർമൻ കളിക്കുന്നത്.

കഴിഞ്ഞ സീസണിലെ സഹകളിക്കാരനായ പുള്‍ഗ ടീമിൽ മടങ്ങിയെത്തിയതിന് പിന്നാലെ താരത്തിന് ആശംസ അറിയിച്ച് ട്വീറ്റ് ചെയ്തിരുന്നു. പുൾഗയ്‌ക്കൊപ്പം കളിയ്ക്കാൻ തനിക്ക് ആഗ്രഹമുണ്ടെന്നും ജർമൻ പറഞ്ഞിരുന്നു. ബ്ലാസ്റ്റേഴ്സിന് വേണ്ടി രണ്ട് സീസണുകളിലായി ആറ് ഗോളുകൾ നേടിയ താരമാണ് ജർമൻ.