കേരളബ്ലാസ്റ്റേഴ്സിന്റെ മുൻ സ്‌ട്രൈക്കർ അന്റോണിയോ ജർമ്മൻ ഐ ലീഗിലെ ഗോകുലം എഫ് സിയിലേക്കെന്ന് സൂചന. സൂപ്പര്‍ കപ്പ് യോഗ്യത മത്സരത്തിനുളള ഗോകുലം ടീമിനെ ശക്തിപ്പെടുത്തുന്നതിന്റെ ഭാഗമായാണ് ജർമ്മനെയും മാസിഡോണിയന്‍ അറ്റാക്കിങ് മിഡ്ഫീല്‍ഡര്‍ ക്രിസ്റ്റിയെയും ടീമിലെത്തിക്കാനുള്ള ശ്രമം നടത്തുന്നത്.

കേരളബ്ലാസ്റ്റേഴ്സിനൊപ്പം കളിക്കാനുള്ള ആഗ്രഹം പങ്ക് വെച്ച് നേരത്തെ ജർമ്മൻ ട്വീറ്റ് ചെയ്തിരുന്നു. എന്നാൽ താരത്തെ ടീമിലെടുക്കാൻ ബ്ലാസ്റ്റേഴ്‌സ് മാനേജ്മെന്റ് തയാറായിരുന്നില്ല. ഇതിന് പിന്നാലെയാണ് ജർമ്മനെ സ്വന്തമാക്കാനുള്ള ശ്രമവുമായി ഗോകുലം രംഗത്തെത്തിയത്.

ജർമ്മനുമായി ചർച്ചകൾ നടക്കുകയാണെന്നും ചർച്ച അവസാന ഘട്ടത്തിലാണെന്നും ഗോകുലം എഫ് സി കോച്ച് ബിനോ ജോർജ്ജ് അറിയിച്ചു.