ലോകകപ്പ് ഫുട്‌ബോള്‍ ലോകത്തിന്റെ ആവേശം മാത്രമല്ല.. കോടികള്‍ മാറിമറിയുന്ന ഒരു ബിസിനസ് കൂടിയാണത്, ആവേശത്തിനുമപ്പുറമാണ് ആ കോടിക്കിലുക്കം. ഫുട്‌ബോള്‍ ലോകകപ്പിന് മൂന്നു ദിവസങ്ങള്‍ മാത്രം അവശേഷിക്കെ ലോകകപ്പ് ടീമുകളുടെ സമ്മാനത്തുകയുടെ കണക്ക് പുറത്തുവന്നു. ലോകകപ്പ് വിജയിയെ കാത്തിരിക്കുന്നത് 254 കോടി രൂപയാണ്.

ലോകകപ്പില്‍ പങ്കെടുക്കുന്ന എല്ലാ ടീമുകള്‍ക്കുമായി 2676 കോടി രൂപയാണ് ഫിഫ നല്‍കുക. ലോകകപ്പ് റണ്ണര്‍ അപ്പ് ടീമിനെ കാത്തിരിക്കുന്നത് 187 കോടിയാണ്. മുന്നാം സ്ഥാനക്കാര്‍ക്ക് 160 കോടിയും ലഭിക്കും. നാലാം സ്ഥാനക്കാര്‍ക്ക് 147 കോടിയുമാണ്.

ക്വാര്‍ട്ടര്‍ ഫൈനലില്‍ പുറത്താകുന്ന നാലു ടീമുകള്‍ക്ക് 107 കോടി രൂപ വീതം ലഭിക്കും. പ്രീക്വാര്‍ട്ടറില്‍ പുറത്താകുന്ന എട്ടു ടീമുകള്‍ക്ക് 80 കോടിയാണ് പ്രതിഫലം. ഗ്രൂപ്പ് ഘട്ടത്തില്‍ തന്നെ പുറത്തായാലും ലോകകപ്പില്‍ പങ്കെടുക്കുന്ന എല്ലാ ടീമുകള്‍ക്കും 53 കോടി രൂപ വീതമാണ് ലഭിക്കുക. ലോകകപ്പിനു മുന്നേ തന്നെ മുന്നൊരുക്കത്തിനായി ഫിഫ 10 കോടി രൂപ നല്‍കിക്കഴിഞ്ഞു. അതേസമയം ലോകകപ്പിനായി താരങ്ങളെ വിട്ടു നല്‍കുന്നതിന് വിവിധ ക്ലബുകള്‍ക്ക് 1398 കോടി രൂപയാണ് ഫിഫ നല്‍കുന്നത്.