2010ല്‍ ജര്‍മ്മനിയുടെ മത്സരങ്ങള്‍ കിറുകൃത്യമായി പ്രവചിച്ചിരുന്നത് പോള്‍ നീരാളിയായിരുന്നു. എന്നാല്‍ ഇത്തവണ ആഷില്ലസ് എന്ന സുന്ദരി പൂച്ചയാണ് പ്രവചനം നടത്തുന്നത്. കഴിഞ്ഞ വര്‍ഷം നടന്ന കോണ്‍ഫഡറേഷന്‍ കപ്പില്‍ പ്രവചനം നടത്തിയ പരിചയവുമായാണ് ആഷില്ലസ് ലോകകപ്പ് പ്രവചനത്തിനെത്തുന്നത്. സെന്റ് പീറ്റേഴ്‌സ് ബര്‍ഗിലെ ഹെര്‍മിറ്റേജ് മ്യൂസിയത്തില്‍ ഇപ്പോള്‍ തന്നെ ഈ സുന്ദരി പൂച്ച എത്തിയിട്ടുണ്ട്. മത്സരം തുടങ്ങുന്ന ദിവസം മുതല്‍ ചുവന്ന ജെഴ്‌സിയും ധരിച്ചായിരിക്കും പൂച്ച പ്രവചനം നടത്തുക.

രണ്ട് പാത്രങ്ങളില്‍ പൂച്ചയ്ക്കുള്ള ഭക്ഷണത്തോടൊപ്പം രണ്ട് രാജ്യങ്ങളുടെ പതാകയും വെക്കും. ഇതില്‍ ആഷില്ലസ് ഏത് പാത്രം ആണോ തിരഞ്ഞെടുക്കുന്നത് അവരെയാണ് വിജയികളായി പ്രവചിക്കുന്നത്. കോണ്‍ഫഡറേഷന്‍ കപ്പില്‍ നടത്തിയ പ്രവചനം ക്ലിക്കായതോടെ ആഷില്ലസിനെ തേടി നിരവധിയാളുകളാണ് മ്യൂസിയത്തില്‍ സന്ദര്‍ശനത്തിനെത്തുന്നത്.

അതേസമയം, ലോകകപ്പില്‍ ടീമുകളെയും മത്സരങ്ങളെയും പഠിക്കുന്ന തിരക്കിലാണ് ആഷില്ലസ് എന്നാണ് മ്യൂസിയം അധികൃതര്‍ പറയുന്നത്.