ഇന്നലെ നടന്ന ഉദ്ഘാടന മല്‍സരത്തില്‍ ആതിഥേയരുടെ ജയം കൃത്യമായി പ്രവചിച്ച അക്കില്ലസ് എന്ന പൂച്ചയ്ക്ക് ഇന്നും പിഴച്ചില്ല. മൊറോക്കോയ്‌ക്കെതിരെ ഏഷ്യന്‍ ശക്തികളായ ഇറാന്‍ ജയിക്കുമെന്ന അക്കില്ലസിന്റെ പ്രവചനവും ശരിയായതോടെ 2010 ലോകകപ്പിലൂടെ പ്രവചനത്തിന്റെ അധിപനായി മാറിയ പോള്‍ നീരാളിയുടെ താരപരിവേഷം അക്കില്ലസിനും ലഭിച്ചുതുടങ്ങുന്നതായാണ് റിപ്പോര്‍ട്ട്.

പതാകകള്‍ കുത്തി, പന്തുകള്‍ നിറച്ച പാത്രങ്ങളില്‍ ഒന്നു തിരഞ്ഞെടുക്കുകയാണ് അക്കില്ലസിന്റെ രീതി. ഇത്തവണ ഇറാന്റെ പതാകയുള്ള പ്ലേറ്റില്‍ നിന്നാണ് അക്കില്ലസ് പൂച്ച ഭക്ഷണം കഴിച്ചത്. കഴിഞ്ഞദിവസം സൌദിയെ റഷ്യ കീഴടക്കുമെന്ന പ്രവചനം ഫലം കണ്ടിരുന്നു. ബധിരനാണെങ്കിലും പ്രവചിക്കാന്‍ അക്കില്ലസിനുള്ള മിടുക്ക് ഇതിനോടകം പ്രശംസ പിടിച്ചുപറ്റിയിട്ടുണ്ട്. 2017 ലെ കോണ്‍ഫെഡറേഷന്‍സ് കപ്പ് വിജയികളെ അക്കില്ലസ് പ്രവചിച്ചത് വലിയ വാര്‍ത്തയായിരുന്നു.