ആരാധകരുടെ അര്‍ജന്റീന ഇതല്ലായിരുന്നു. റഷ്യന്‍ മണ്ണില്‍ മെസ്സിപ്പട വീരേതിഹാസം രചിക്കുമെന്ന് വമ്പു പറഞ്ഞ അര്‍ജന്റീന ആരാധകരെ കണ്ണീരിലാഴ്ത്തി നിഷ്‌നിയിലെ സ്‌റ്റേഡിയത്തില്‍ ക്രൊയേഷ്യയ്ക്ക് തകര്‍പ്പന്‍ ജയം. എതിരില്ലാത്ത മൂന്നു ഗോളുകള്‍ക്കാണ് ക്രൊയേഷ്യ ജയിച്ചുകയറിയത്. ഗോള്‍രഹിതമായ ആദ്യപകുതിക്കു ശേഷം രണ്ടാം പകുതിയിലായിരുന്നു ക്രൊയേഷ്യയുടെ മൂന്നു ഗോളുകള്‍. ആന്റെ റെബിച്ച് (53), ലൂക്കാ മോഡ്രിച്ച് (80), ഇവാന്‍ റാക്കിട്ടിച്ച് (90+1) എന്നിവരാണ് ക്രൊയേഷ്യയ്ക്കായി ഗോള്‍ േനടിയത്. സൂപ്പര്‍ താരം ലയണല്‍ മെസ്സിയുള്‍പ്പെടെയുള്ളവര്‍ തീര്‍ത്തും നിറം മങ്ങിയതോടെ കടലാസിന്റെ കരുത്തിന്റെ നിഴല്‍ മാത്രമായിരുന്നു കളത്തിലെ അര്‍ജന്റീന

ആദ്യം ഗോള്‍കീപ്പര്‍ വില്ലി കബല്ലാരോ ഒരു ഗോള്‍ സമ്മാനിച്ചു. പിന്നെ ലൂക്ക മോഡ്രിച്ചിന്റെ ഗോള്‍. കബല്ലാരോ ഇട്ടുകൊടുത്ത ഒരു പന്ത് സമര്‍ഥമായി വലയിലെത്തിച്ച ആന്റെ റെബിച്ചാണ് ക്രൊയേഷ്യയെ മുന്നിലെത്തിച്ചത്. അര്‍ജന്റജീന ഒരു ഗോളിന്റെ വക്കിലായിരുന്നു. അവിടെ നിന്നും മധ്യനിരയിലേയ്ക്ക് പന്ത് പറന്നുവരുമ്പോള്‍ രണ്ട് അര്‍ജന്റൈന്‍ ഗോള്‍ ഏരിയയില്‍ ഉണ്ടായിരുന്നത് രണ്ട് ഡിഫന്‍ഡര്‍മാര്‍. എങ്കിലും അത്ര വലിയ അപകടമൊന്നും ഉണ്ടായിരുന്നില്ല ഗോളി മെര്‍ക്കാഡോ കബല്ലാരോയ്ക്ക് പന്ത് തട്ടിക്കൊടുക്കുമ്പോള്‍. എന്നാല്‍, കബല്ലാരോ വീണ്ടും മെര്‍ക്കാഡോയ്ക്ക് തന്നെ കൊടുക്കാനുള്ള കബല്ലാരോയുടെ ശ്രമമാണ് ആത്മഹത്യാപരമായത്. നേരത്തെ കാലിലേയ്ക്ക് ഇട്ടുകൊടുത്ത പന്ത് ഒന്നാന്തരമൊരു വോളിയിലൂടെ റെബിച്ച് വലയിലെത്തിച്ചു. അര്‍ജന്റീന ഞെട്ടിയ നിമിഷം.

ഇരുപത്തിയഞ്ച് വാര അകലെ നിന്ന് പിടിച്ചെടുത്ത പന്തുമായി ഓട്ടമന്‍ഡിയെ കബളിപ്പിച്ചാണ് മോഡ്രിച്ച് ആ വെടിയുണ്ട പായിച്ചത്.
ഒരേയൊരു അവസരമാണ് അവര്‍ജന്റീനയ്ക്ക് ലഭിച്ചത്. മെസ്സി ഏറെക്കുറേ കാഴ്ചക്കാരനായി നില്‍ക്കുന്ന അത്യപൂര്‍വ കാഴ്ചയ്ക്കും ഒന്നാം പകുതി സാക്ഷ്യം വഹിച്ചു. ഗോളിനോട് കൂടുതല്‍ അടുത്തെത്തിയത് ക്രൊയേഷ്യയാണ്. എന്നാല്‍, അവസരങ്ങള്‍ ഉണ്ടാക്കുന്നതിനേക്കാള്‍ കിട്ടിയ അവസരങ്ങള്‍ ധൂര്‍ത്തടിച്ചു കളയുന്നതിലായിരുന്നു ക്രൊയേഷ്യയുടെ മിടുക്ക്.