=ലോകകപ്പില്‍ സ്വിറ്റ്‌സര്‍ലന്‍ഡും സെര്‍ബിയയും തമ്മിലുള്ള പോരാട്ടം കഴിഞ്ഞതോടെ ഇരുരാജ്യങ്ങളുടെയും നയതന്ത്ര ബന്ധത്തില്‍ തന്നെ നിഴല്‍ വീഴ്ത്തിയേക്കാവുന്ന പുതിയൊരു വിവാദത്തിനാണ് തുടക്കമായിരിക്കുകയാണ്. എന്നാല്‍ ഇവര്‍ രാഷ്ട്രീയ വൈരികളല്ല. ടൂര്‍ണമെന്റിന്റെ ശോഭ തന്നെ കെടുത്താന്‍ പോന്ന ഈ വിവാദത്തിന് കാരണമായത് സ്വിറ്റ്‌സര്‍ലന്‍ഡ് സെര്‍ബിയന്‍ വലയില്‍ അടിച്ചുകയറ്റിയ ഗോളുകളല്ല, എന്നാല്‍ എണ്ണം പറഞ്ഞ ആ ഗോളുകള്‍ നേടിയ ഷെര്‍ദാന്‍ ഷാക്കിരിയും ഗ്രാനിറ്റ് ഷാക്കയും നടത്തിയ ആഘോഷങ്ങളാണ്. 

ഗോളടിച്ചശേഷം നെഞ്ചില്‍ കൈകള്‍ കുറുകേ വച്ചായിരുന്നു ഇരുവരുടെയും ആഘോഷം. അല്‍ബേനിയയുടെ ഇരട്ടത്തലയുള്ള പരുന്തിനെയാണ് കൊസോവന്‍ വംശജരായ ഇവര്‍ കാണിച്ചത്. 2008 തങ്ങളില്‍ നിന്ന് സ്വാതന്ത്ര്യം നേടിയ പഴയ പ്രവിശ്യയായ കൊസോവയെ സെര്‍ബിയ ഇതുവരെ അംഗീകരിച്ചിട്ടില്ലെന്നത് ഒരു കാരണമാണ്. മാത്രമവുമല്ല, 1998, 99 കാലഘട്ടത്തില്‍ നടന്ന കൊസോവ യുദ്ധത്തിന്റെ മുറിവുകള്‍ ഇനിയും ഉണങ്ങിയിട്ടുമില്ല. ഇപ്പോഴും ഇവര്‍ തമ്മിലുള്ള സംഘര്‍ഷം നിലനില്‍ക്കുന്നുമുണ്ട്.

ഈ സാഹചര്യത്തില്‍ തങ്ങല്‍ക്കെതിരെയുള്ള ജയം കൊസോവയുടെ അടയാളം തന്നെ കാട്ടി സ്വിസ് താരങ്ങള്‍ ആഘോഷിച്ചത് തങ്ങളെ മുറിപ്പെടുത്താനും അപമാനിക്കാനും തന്നെയാണെന്നാണ് വലിയൊരു വിഭാഗം സെര്‍ബിയക്കാരും വിശ്വസിക്കുന്നത്. ഇതാണ് രണ്ട് ഗോളുകള്‍ വലിയൊരു രാഷ്ട്രീയ വിവാദത്തിന് വഴിമരുന്നിട്ടത്. കൊസോവയെ ചൊല്ലിയുള്ള വിവാദം മത്സരത്തിന്‍ മുമ്പ് തന്നെ റഷ്യയില്‍ നിഴലിട്ടു നിന്നിരുന്നു. ഇടതു ബൂട്ടില്‍ സ്വിസ് പതാക തുന്നിച്ചേര്‍ത്ത ഷാക്കിരി വലതു കാലില്‍ കൊസോവയുടെ പതാക തുന്നിച്ചേര്‍ത്ത ബൂട്ടും ധരിച്ചാണ് താന്‍ കളിക്കാനിറങ്ങുക എന്ന് നേരത്തെ പ്രഖ്യാപിച്ചിരുന്നു. കൊസോവയ്ക്ക് പരസ്യമായി ഐക്യദാര്‍ഢ്യം പ്രഖ്യാപിച്ച ഷാക്കിരി രാഷ്ട്രീയ മാനമുള്ള ഈ ബൂട്ടിന്റെ ചിത്രം ഇയ്യിടെ ഷാക്കിരി തന്റെ ഇന്‍സ്റ്റഗ്രാമില്‍ പോസ്റ്റ് ചെയ്യുകയും ചെയ്തിരുന്നു. കൊസോവയോട് അത്രയ്ക്കും സ്‌നേഹമാണെങ്കില്‍ അയാള്‍ എന്തുകൊണ്ടാണ് അവര്‍ക്കുവേണ്ടി കളിക്കാനുള്ള അവസരം ഒഴിവാക്കിയത് എന്നാണ് ലോകകപ്പില്‍ സെര്‍ബിയയുടെ ആദ്യ ഗോളടിച്ച മിത്രോവിച്ച് നേരത്തെ ചോദിച്ചത്. സ്വിറ്റ്‌സര്‍ലന്‍ഡിനെതിരായ മത്സരത്തിന് മുന്പ് തന്നെ സെര്‍ബിയക്കാരും കൊസോവക്കാരും തമ്മില്‍ വലിയ സംഘര്‍ഷമുണ്ടായിരുന്നു.