സൈറ വസീം മതത്തിന്റെ പേരിൽ അഭിനയ ജീവിതത്തോട് വിട പറയുന്നു എന്ന വാർത്തക്ക് പിന്നാലെ നിരവധി പ്രതികരണങ്ങളാണ് ഉയർന്നിരിക്കുന്നത്. നടൻ സിദ്ധാർഥും വിഷയത്തിൽ പ്രതികരണവുമായി മുന്നോട്ടു വന്നിരിക്കുകയാണ്.

കലയില്‍ മതത്തിന്റെ ആവശ്യമില്ലെന്നും ഒരാളെ മതം കലയില്‍ നിന്ന് പിന്തിരിപ്പിക്കുന്നുവെങ്കില്‍ അന്തിമമായി ആ വ്യക്തി കലയ്ക്ക് ചേര്‍ന്ന ആളല്ലെന്നുമാണ് സിദ്ധാർഥ് പറഞ്ഞിരിക്കുന്നത്. എന്നിരുന്നാലും സൈറയുടെ വ്യക്തി സ്വാതന്ത്ര്യത്തെ മാനിക്കുക കൂടി ചെയ്യുന്നു നടൻ. "ഇത് നിങ്ങളുടെ ജീവിതമാണ്. നിങ്ങൾക്ക് ഇഷ്ടമുള്ളത് ചെയ്യാം. നിങ്ങളുടെ ഭാവി ജീവിതം നന്നായിരിക്കട്ടെ. ഞാൻ വിശ്വസിക്കുന്നത് നമ്മുടെ കലയും ജോലിയുമാണ് നമ്മുടെ ജീവിതമെന്നാണ്. മതത്തെ അതിൽ നിന്നും പുറത്താക്കാൻ നാം പരിശ്രമിക്കണം. മതം ഇവിടെ ആവശ്യമില്ല. നിങ്ങളുടെ മതമാണ് നിങ്ങളെ കൊണ്ട് ഇത് ചെയ്യിപ്പിച്ചതെങ്കിൽ, നിങ്ങൾ ഇതിനു ചേർന്ന വ്യക്തിയല്ല"- സിദ്ധാർഥ് പറഞ്ഞു.

സിനിമാഭിനയം നിര്‍ത്തുകയാണെന്ന് നടി സൈറ വസീം പ്രഖ്യാപിച്ചത് വലിയ ചര്‍ച്ചാവിഷയമായിരുന്നു. നിരവധി പേരാണ് സൈറയെ അനുകൂലിച്ചും പ്രതികൂലിച്ചും രംഗത്ത് വന്നത്. ഹിന്ദു മഹാസഭ പ്രസിഡന്റ് ചക്രപാണിയും സൈറയുടെ തീരുമാനത്തെ അഭിനന്ദിക്കുകയും ഹിന്ദു നടിമാരും ഇതേ മാതൃക പിന്തുടരണമെന്നും അറിയിച്ചിരുന്നു. ഏറ്റവും ഒടുവിൽ സിദ്ധാർത്ഥിൻറെ അഭിപ്രായമാണ് പുറത്തു വന്നിരിക്കുന്നത്. അഭിനയ രംഗത്തു തുടരുന്നത് തന്നെ വിശ്വാസത്തിൽ നിന്നും അകറ്റുന്നുവെന്നും ദൈവത്തോട് ചേർന്ന് ജീവിക്കാൻ അഭിനയ രംഗം അവസാനിപ്പിക്കുന്നുവെന്നാണ്‌ സൈറ പറഞ്ഞത്.