ഇനി രാജ്യസഭയിലേക്ക് മത്സരിക്കാനില്ലെന്ന് പ്രതികരിച്ച് കോണ്‍ഗ്രസ് നേതാവ് എ കെ ആന്റണി രംഗത്ത് എത്തിയിരിക്കുകയാണ്. മത്സരിക്കാനില്ലെന്ന തീരുമാനം ഹൈക്കമാന്‍ഡിനെ അറിയിച്ചെന്നും ഇതുവരെ നല്‍കിയ അവസരങ്ങള്‍ക്ക് കോണ്‍ഗ്രസ് അധ്യക്ഷ സോണിയ ഗാന്ധിയോട് നന്ദിയുണ്ടെന്നും ആന്റണി അറിയിക്കുകയുണ്ടായി. ആന്റണിക്ക് പകരക്കാരനെ കണ്ടെത്താന്‍ കെപിസിസി ശ്രമം തുടങ്ങിയിരിക്കുകയാണ്. എ കെ ആന്റണി മാറുമ്പോള്‍ പകരം ആരെന്ന് ചോദ്യത്തിന് ഉത്തരം കണ്ടെത്തുകയാണ് കോണ്‍ഗ്രസിനു മുന്നിലെ വെല്ലുവിളി എന്നത്.

എന്നാൽ ഇതിനെതിരെ നിരവധി പേരാണ് രംഗത്ത് എത്തിയിരിക്കുന്നത്. എകെ ആന്റണി ഇനി വിശ്രമിക്കുന്നു എന്ന് വാർത്ത. ഇത്രയും കാലം അദ്ദേഹം മറ്റെന്താണ് ചെയ്തത് ആവോ? എന്ന ചോദ്യം ചോദിക്കുകയാണ് അഡ്വ. ഹരീഷ് വാസുദേവൻ. ഫേസ്ബുക്കിലൂടെയാണ് അദ്ദേഹത്തിനെതിരെ വിമർശനം ഉണ്ടയിച്ചിരിക്കുന്നത്.

ഫേസ്ബുക്ക് കുറിപ്പ് ഇങ്ങനെ;

എകെ ആന്റണി ഇനി വിശ്രമിക്കുന്നു എന്ന് വാർത്ത. ഇത്രയും കാലം അദ്ദേഹം മറ്റെന്താണ് ചെയ്തത് ആവോ?

മറ്റു എംപി മാരുടെ പെർഫോമൻസ് താരതമ്യപ്പെടുത്തുമ്പോൾ രാജ്യസഭയിൽ കഴിഞ്ഞ 6 വർഷം AK ആന്റണി എന്ത് ചെയ്തു എന്ന ചോദ്യം കൊണ്ഗ്രസുകാർ ജനങ്ങളിൽ നിന്ന് നേരിടും, പറയാൻ മറുപടി കരുതി വെയ്ക്കണം. ആന്റണിക്ക് അക്കൗണ്ടബിലിറ്റി ഇല്ലെങ്കിലും കോണ്ഗ്രസിന് ഉണ്ട്. കോണ്ഗ്രസ് രക്ഷപ്പെടണമെന്നു ജനം മുഴുവനും ആഗ്രഹിച്ചാലും കോണ്ഗ്രസ് നേതൃത്വം സമ്മതിക്കില്ല. AK ആന്റണിമാരാണ് തലപ്പത്ത്.

കടൽക്കിഴവന്മാർക്ക് വിശ്രമിക്കാനല്ല രാജ്യസഭ എന്നു കോണ്ഗ്രസ് നേതൃത്വത്തോട് പറയാനുള്ള ചെറുപ്പം 76 ആം വയസിൽ ആന്റണിയെ അങ്ങോട്ട് അയച്ചപ്പോൾ കോണ്ഗ്രസിൽ ആരും കാണിച്ചില്ല. ഇനിയെങ്കിലും കാണിക്കുമോ? സമുദായ പ്രീണനം, ഗ്രൂപ്പ് പ്രീണനം ഒക്കെ നോക്കി കേവീ തോമസിനെപ്പോലെയുള്ള ആൾക്കാരെ അയച്ചാൽ കോണ്ഗ്രസിനേ രക്ഷിക്കാൻ ഡിങ്കന് പോലും കഴിയില്ല.

നെഹ്റു കുടുംബത്തിലെ എല്ലാവരെയും കഴിഞ്ഞ് ഇനി റോബർട്ട് വാദ്രയ്ക്കും ഉണ്ടിരുന്നപ്പോൾ ഒരു വിളി ഉണ്ടായത്രെ !! അയാൾക്കെങ്ങാനും രാജ്യസഭ കൊടുത്താൽ തലയിൽ മുണ്ടിട്ട് അല്ലാതെ കോണ്ഗ്രസുകാർക്ക് ഇനി നാട്ടിലിറങ്ങാൻ പറ്റുമെന്ന് തോന്നുന്നില്ല.

ഇന്ത്യൻ ജനാധിപത്യത്തെ പ്രതിസന്ധിയിൽ നിന്ന് രക്ഷിക്കേണ്ട പാർട്ടിയാണ്, പാർട്ടി അധ്യക്ഷൻ പോലും പാർലമെന്റിൽ ആവറേജിലും എത്രയോ കുറഞ്ഞ പ്രകടനമാണ്. ഹാജർ പോലുമില്ല !! നേതൃത്വത്തിന്റെ മണ്ടത്തരങ്ങൾക്ക് ഏറാൻമൂളി അണികൾ കേട്ടാൽ, നാശത്തിൽ നിന്നും തിരിച്ചുവരാനായി ഇനിയൊരു ബാല്യം കോണ്ഗ്രസിന് ബാക്കിയില്ല. അത് ഓർത്തു വേണം രാജ്യസഭാ സീറ്റ് കൊടുക്കുന്നത്..