ജയിലിലായ ദിലീപ് തന്റെ വീട്ടുകാരോട് ഒരാഗ്രഹം മാത്രമാണ് പ്രകടിപ്പിച്ചിരുന്നത്. ദയവു ചെയ്ത് കാവ്യയോ അമ്മയോ മകളോ തന്നെ കാണാന്‍ വരരുതെന്ന് ഫോണിലൂടെ അവരോട് അപേക്ഷിച്ചിരുന്നു. ഇക്കാര്യം അനുജനായ അനൂപിനോടും പറഞ്ഞിരുന്നു. എന്നാല്‍ അമ്മയ്ക്ക് ദിലീപിനെ കാണാതിരിക്കാന്‍ കഴിഞ്ഞില്ല. വളരെ നിര്‍ബന്ധപൂര്‍വ്വം അനുപിനോടൊപ്പം ജയിലിലെത്തി ദിലീപിനെ കാണുകയായിരുന്നു. അപ്രതിക്ഷിതമായുള്ള അമ്മയുടെ വരവ് ദിലീപിനെ ഞെട്ടിച്ചു. തുടര്‍ന്ന് ആ ഞെട്ടല്‍ മാറിയപ്പോഴേക്കും അത് സങ്കടത്തില്‍ കലാശിച്ചു. പരസ്പരം ആശ്വസിപ്പിക്കാനാകാതെ ഇരുവരും തേങ്ങി കരഞ്ഞു. ഇതുകണ്ട അനൂപിനും സങ്കടം സഹിക്കാനായില്ല. ഇതിനു സാക്ഷ്യം വഹിച്ച പോലീസുകാകുടേയും കണ്ണുകള്‍ നനഞ്ഞു. 

ദിലീപിന്റെ സഹോദരന്‍ അനൂപിനൊപ്പം ഉച്ചകഴിഞ്ഞ് 3.25 ഓടെയാണ് ഇവര്‍ സബ് ജയിലില്‍ എത്തിയത്. ദിലീപ് അറസ്റ്റിലായി ഒരു മാസം പിന്നിട്ട സാഹചര്യത്തിലാണ് താരത്തിന്റെ അമ്മ സബ് ജയിലില്‍ എത്തിയിരിക്കുന്നത്. ദിലീപിന്റെ സഹോദരീ ഭര്‍ത്താവ് സൂരജും സബ് ജയിലില്‍ എത്തിയെങ്കിലും അകത്തേക്ക് പ്രവേശിച്ചില്ല. ഇതിനു മുമ്പ് സഹോദരന്‍ അനൂപ് അല്ലാതെ മറ്റ് അടുത്ത ബന്ധുക്കളൊന്നും ദിലീപിനെ സന്ദര്‍ശിക്കാന്‍ എത്തിയിരുന്നില്ല. അമ്മയോടും മകള്‍ മീനാക്ഷിയോടും ഭാര്യ കാവ്യാ മാധവനോടും തന്നെ കാണാന്‍ വരരുതെന്ന് ദിലീപ് നിര്‍ദ്ദേശിച്ചതായാണ് വിവരം.

എന്നാല്‍ ദിലീപിന്റെ ജയില്‍ വാസം നീളുന്ന സാഹചര്യത്തില്‍ അമ്മ മകനെ കാണാന്‍ എത്തുകയായിരുന്നു. ജൂലൈ പത്തിനാണ് ദിലീപ് അറസ്റ്റിലാകുന്നത്. ഇതിനു ശേഷം ദിലീപിനെ മൂന്നു തവണ കോടതി റിമാന്‍ഡ് ചെയ്തിരുന്നു. അങ്കമാലി ഒന്നാം ക്ലാസ് മജിസ്‌ട്രേറ്റ് കോടതിയിലും ഹൈക്കോടതിയിലും ദിലീപ് ജാമ്യാപേക്ഷ നല്‍കിയിരുന്നെങ്കിലും രണ്ടു തവണയും കോടതി ഹര്‍ജി തള്ളുകയായിരുന്നു.

ഇതേത്തുടര്‍ന്ന് ദിലീപിനായി കേസ് വാദിച്ചിരുന്ന അഡ്വ. രാംകുമാറിനെ മാറ്റി രാമന്‍പിള്ള അസോസിയേറ്റ്‌സിനെ കേസേല്‍പിച്ചു. രാമന്‍പിള്ള അസോസിയേറ്റ്‌സ് കഴിഞ്ഞ ദിവസം ഹൈക്കോടതിയില്‍ വീണ്ടും ജാമ്യാപേക്ഷ സമര്‍പ്പിച്ചിട്ടുണ്ട്. കോടതി ഹര്‍ജി പരിഗണിക്കാനിരിക്കൊണ് അമ്മയുടെ സന്ദര്‍ശനം. അതേസമയം ദിലീപിന്റെ ജാമ്യാപേക്ഷ പരിഗണിക്കുന്നത് ഹൈക്കോടതി അടുത്ത വെള്ളിയാഴ്ച്ചത്തേക്ക് മാറ്റിയിരുന്നു.

റിമാന്‍ഡു തടവുകാരനായി ആലുവ സബ് ജയിലില്‍ കഴിയുന്ന മകനെ സരോജം കണ്ടിട്ട് ഒരു മാസത്തോളമായി. കേസും ചുറ്റും നടക്കുന്ന കാര്യങ്ങളെ കുറിച്ചുമെല്ലാം അമ്മ അറിയുന്നുണ്ടായിരുന്നു. എന്നാല്‍, തെറ്റേത് ശരിയേത് എന്ന വേവലാതി നോക്കാതെ മകന്‍ തെറ്റുകാരനല്ലെന്ന് വിശ്വസിച്ച് വീട്ടില്‍ പ്രാര്‍ത്ഥനുകളുമായി കഴിച്ചു കൂട്ടിയ അമ്മ സരോജം ഇന്ന് ഉച്ചയോടെയാണ് ആലുവ സബ് ജയിലില്‍ എത്തി മകനെ കണ്ടത്. കേസില്‍ ജാമ്യം കിട്ടാതെ നീണ്ടു പോകുന്ന സാഹചര്യത്തിലാണ് നടന്‍ മകനെ കാണാനുള്ള താല്‍പ്പര്യം അവര്‍ പ്രകടിപ്പിച്ചത്.