മുന്ഗണനാ ലിസ്റ്റില് നിന്ന് ഒഴിവാക്കല് നടപടി; പെന്ഷന്കാരുടെ റേഷന്കാര്ഡുകള് പരിശോധിക്കാന് നിര്ദേശം
സര്ക്കാര്, അര്ധസര്ക്കാര്, സഹകരണ ഉദ്യോഗസ്ഥരുടെ റേഷന്കാര്ഡുകള് മുന്ഗണനാ ലിസ്റ്റില്നിന്ന് ഒഴിവാക്കാനുള്ള നടപടികള്ക്ക് പിന്നാലെ സര്വിസ്, കുടുംബ പെന്ഷന്കാരുടെ കാര്ഡുകളും പരിശോധിക്കാന് നിര്ദേശം. സംസ്ഥാന ട്രഷറി ഡയറക്ടറേറ്റിന്റെ എം.എസ്. 15667/2017 നമ്പര് ഉത്തരവിലാണ് ബന്ധപ്പെട്ട ട്രഷറി ഓഫിസര്മാര്ക്ക് ഇതുസംബന്ധിച്ച നിര്ദേശം നല്കിയത്.
പെന്ഷന്കാര് മുന്ഗണനാ ലിസ്റ്റില് ഉള്പ്പെട്ടിട്ടുണ്ടോ എന്ന് പരിശോധിക്കുന്നതിന്റെ ഭാഗമായി പെന്ഷന്കാരുടെ പേരുവിവരം ഉള്പ്പെടുത്തിയ കാര്ഡിന്റെ ഒറിജിനല് പരിശോധിച്ച് പി.ഐ.എം.എസ് പ്രോഗ്രാമില് ഉള്പ്പെടുത്തിയിരിക്കുന്ന ഓപ്ഷനില് ചേര്ക്കുന്നതിന് അടിയന്തര നടപടി സ്വീകരിക്കണമെന്ന് ഉത്തരവില് പറയുന്നു.
കൂടാതെ, റേഷന്കാര്ഡിന്റെ ആദ്യ പേജിന്റെയും പേര് ഉള്പ്പെടുന്ന പേജിന്റെയും പകര്പ്പ് പി.പി.ഒ നമ്പര്, പെന്ഷന് കോഡ് രേഖപ്പെടുത്തി ട്രഷറിയില് സൂക്ഷിക്കാനും ആവശ്യപ്പെട്ടിട്ടുണ്ട്. മുന്ഗണനാ പട്ടികയില് കടന്നുകൂടിയവയുടെ വിവരം റേഷന്കാര്ഡ് നമ്പര് സഹിതം ബന്ധപ്പെട്ട താലൂക്ക് സപ്ലൈ ഓഫിസര്ക്ക് ഈ മാസം 20ന് മുമ്പ് റിപ്പോര്ട്ട് നല്കണം.
റേഷന്കാര്ഡ് ഇല്ലാത്തവരുടെ കാര്യത്തില് അക്കാര്യം സംബന്ധിച്ച് ഒരു സത്യവാങ്മൂലം വാങ്ങി സപ്ലൈ ഓഫിസര്ക്ക് നല്കാനും പെന്ഷന് വാങ്ങുന്നവരെ ഇതുസംബന്ധിച്ച് ബോധവത്കരിക്കാനുള്ള നടപടി സ്വീകരിക്കാനും നിര്ദേശമുണ്ട്. നിര്ദേശങ്ങള് സംബന്ധിച്ച് സ്വീകരിച്ച നടപടികള് ജില്ല ട്രഷറി ഓഫിസില് റിപ്പോര്ട്ട് ചെയ്യാനും ആവശ്യപ്പെട്ടിട്ടുണ്ട്.
https://www.facebook.com/Malayalivartha
