മദ്യപിച്ച് വാഹനം ഓടിച്ചയാള്‍ അപകടത്തില്‍ മരിച്ചതിനു പിന്നാലെ വാഹന ഉടമക്കെതിരെ പോലീസ് കേസ് രജിസ്റ്റര്‍ ചെയ്തു. തെലങ്കാന തലസ്ഥാനമായ ഹൈദരാബാദിലാണ് സംഭവം അരങ്ങേറിയത്. തിങ്കളാഴ്ച്ചയാണ് അപകടം നടന്നതെന്ന് പോലീസ് അറിയിച്ചു. മരണപ്പെട്ടയാള്‍ ഹെല്‍മെറ്റില്ലാതെയായിരുന്നു ബൈക്ക് ഓടിച്ചിരുന്നത്. മദ്യ ലഹരിയിലിരിക്കുന്ന ആള്‍ക്ക് വാഹനമോടിക്കാന്‍ അനുമതി നല്‍കി എന്നതാണ് ബൈക്ക് ഉടമെക്കെതിരെ പോലീസ് ചുമത്തിയിരിക്കുന്ന കേസ്. ഹൈദരാബാദില്‍ മദ്യപിച്ച് വാഹനം ഓടിച്ചതിന് നിരവധി പേര്‍ക്കെതിരെയാണ് സംസ്ഥാന പോലീസ് ഈയടുത്തായി കേസെടുത്തിരിക്കുന്നത്. കഴിഞ്ഞ പുതുവര്‍ഷ ദിനത്തില്‍ മാത്രം 1,700 ലധികം പേര്‍ക്കേതിരെയാണ് നഗരത്തില്‍ മദ്യപിച്ച് വാഹനമോടിച്ചത് പോലീസ് കേസെടുത്തത്. നഗരത്തിലെ പോലീസ് സ്‌റ്റേഷനുകളായ ഹൈദരാബാദ്, സൈബറാബാദ്, രാച്ചകൊണ്ട ഏരിയകളിലാണ് കേസുകളള്‍ രേഖപ്പെടുത്തിയത്. പുതിയ ട്രാഫിക് നിയമം അനുസരിച്ച് മദ്യപിച്ച് വാഹനം ഓടിക്കുന്നവര്‍ക്ക് 10,000 രൂപ വരെ പിഴയും ആറു മാസത്തെ ജയില്‍ ശിക്ഷയും ലഭിക്കും. ആദ്യ തവണ പിടിക്കപ്പെടുന്നവര്‍ക്കാണ് ഈ ശിക്ഷ. രണ്ടാം തവണയും ഇതേ കുറ്റം ചെയ്തു പിടിക്കപ്പെടുന്നവര്‍ക്ക് 15,000 രൂപ പിഴയും രണ്ട് വര്‍ഷത്തെ തടവും ലഭിക്കും. ഇതിനു പുറമെ മദ്യപിച്ചു വാഹനമോടിക്കുന്നവരുടെ ഡ്രൈവിംഗ് ലൈസന്‍സ് പിടിച്ചെടുക്കുകയും അതാത് ആര്‍ടിഒ ഓഫീസര്‍മാര്‍ക്ക് കൈമാറി അവ സസ്‌പെന്റ് ചെയ്യാനും ആവശ്യപ്പെടുകയും ചെയ്യും.