ഓസ്‌ട്രേലിയയില്‍ യുവാവിന്റെ ആക്രമണത്തിന് ഇരയായ ഇന്ത്യന്‍ വിദ്യാര്‍ത്ഥി ഗുരുതര പരിക്കേറ്റ് ചികിത്സയിൽ. നെഞ്ചിലും മുഖത്തും വയറ്റിലും കുത്തേറ്റ ഇരുപത്തിയെട്ടുകാരനായ വിദ്യാര്‍ത്ഥി ചികിത്സയിലാണ്. സിഡ്നിയിലെ ന്യൂ സൗത് വെയില്‍സ് യൂനിവേഴ്‌സിറ്റിയില്‍ പിഎച്ഡിക്ക് പഠിക്കുന്ന ശുഭം ഗാര്‍ഗ് ആണ് ക്രൂരമായ ആക്രമണത്തിന് ഇരയായത്.

ഗാര്‍ഗിന്റെ നില ഗുരുതരമാണെന്ന് ആശുപത്രി അധികൃതര്‍ അറിയിച്ചു. മദ്രാസ് ഐഐടിയില്‍ നിന്ന് ബിരുദം നേടിയ ശേഷം സെപ്റ്റംബര്‍ ഒന്നിനാണ് ശുഭം ഓസ്ട്രേലിയയിലേക്ക് പോയത്. ഉത്തര്‍പ്രദേശിലെ ആഗ്രയില്‍ താമസിക്കുന്ന ഗാര്‍ഗിന്റെ മാതാപിതാക്കള്‍ ഓസ്ട്രേലിയയിലേക്ക് പോകുന്നതിന് വിസ നേടാനുള്ള ശ്രമത്തിലാണ്.ഒക്ടോബര്‍ ആറിന് രാത്രി 10.30ഓടെയായിരുന്നു സംഭവം. റോഡിലൂടെ നടക്കുകയായിരുന്ന ശുഭം ഗാര്‍ഗിനെ 27കാരനായ ഡാനിയല്‍ നോര്‍വുഡ് ആക്രമിക്കുകയായിരുന്നുവെന്നും ഇയാളെ കൊലക്കുറ്റം ചുമത്തി അറസ്റ്റ് ചെയ്തതായും പൊലീസ് പറഞ്ഞു.

എടിഎമില്‍ നിന്ന് പണവുമായി മടങ്ങുന്നതിനിടെ ഒരാള്‍ പണം ആവശ്യപ്പെട്ട് കത്തികാട്ടി ഭീഷണിപ്പെടുത്തിയെന്നും വിസമ്മതിച്ചതോടെ അക്രമി ഓടി രക്ഷപ്പെടുന്നതിന് മുമ്പ് പലതവണ കുത്തുകയായിരുന്നുവെന്നാണ് റിപ്പോർട്ട്. കുത്തേറ്റതോടെ അടുത്ത ഒരു വീട്ടില്‍ സഹായം തേടിയ ഗാര്‍ഗിനെ പിന്നീട് ആശുപത്രിയിലെത്തിക്കുകയായിരുന്നു. കൃത്യത്തിന് ശേഷം അക്രമി ഓടി രക്ഷപ്പെട്ട അക്രമിയെ പിന്നീട് പിടികൂടുകയായിരുന്നു.