പുസ്തകങ്ങള്‍ നിധിപോലെ സൂക്ഷിക്കുന്നവരാണ് അക്ഷരങ്ങളെ സ്‌നേഹിക്കുന്നവര്‍. പ്രത്യേകിച്ച് വയനാശീലമുള്ളവര്‍.എന്നാല്‍ കൗതുകകരമായ എന്തെങ്കിലും ഘടകം കൊണ്ട് ശ്രദ്ധേയമാകുന്ന ചിലതുണ്ട്. അങ്ങനെ വായനാ ലോകത്തും ശാസ്ത്ര ലോകത്തും അതിശയമാകുകയാണ് സയന്‍സ് ഗേള്‍ എന്ന ട്വിറ്റര്‍ അക്കൗണ്ടില്‍ പങ്കുവെച്ച ഒരു പുസ്തകം.താളുകള്‍ പൂര്‍ണമായും കരിപിടിച്ചതുപോലെ കറുത്തിരിക്കുന്നു. ഒരു അക്ഷരവും കാണാന്‍ ഇല്ല. ഇതെങ്ങനെ വായിക്കും, എവിടെ അക്ഷരങ്ങള്‍ എന്നൊക്കെ പുസ്തകം കാണുമ്‌ബോള്‍ തോന്നും. പക്ഷെ, രസകരമായ കാര്യമെന്തെന്നുവെച്ചാല്‍, തീ കണ്ടാല്‍ മാത്രമേ ഈ അപൂര്‍വ പുസ്തകം വായിക്കാന്‍ സാധിക്കൂ.

റേ ബ്രാഡ്‌ബെറി എഴുതിയ ഫാരന്‍ഹെയിറ്റ് 451 എന്ന പുസ്തകമാണ് സമൂഹമാധ്യമങ്ങളില്‍ ചര്‍ച്ചയാകുന്നത്. താളുകളിലൂടെ ഒരു ലൈറ്റര്‍ കത്തിച്ച് ഓടിക്കുമ്‌ബോള്‍ അക്ഷരങ്ങള്‍ തെളിഞ്ഞുവരുന്നു.പുസ്തകങ്ങള്‍ കത്തിക്കാന്‍ ഇഷ്ടപ്പെടുന്ന ഒരു അഗ്‌നിശമന സേന ജീവനക്കാരന്റെ കഥയാണ് ഈ പുസ്തകം പങ്കുവയ്ക്കുന്നത്. പുസ്തകം വിതരണത്തിനെടുത്തിരിക്കുന്ന സൂപ്പര്‍ ടെറൈന്‍ എന്ന വെബ്‌സൈറ്റ് തീ പോലുള്ള ചൂടുള്ള പദാര്‍ത്ഥങ്ങള്‍ ചേര്‍ന്നിരുന്നാല്‍ അക്ഷരങ്ങള്‍ തെളിയുന്ന തരത്തില്‍ നിര്‍മിച്ചിരിക്കുന്നതെന്ന് വ്യക്തമാക്കുന്നു.
മാത്രമല്ല, എന്താണ് ഈ മാജിക് ബുക്കിന്റെ രഹസ്യം എന്ന് പുസ്തകത്തില്‍ വ്യക്തമാക്കുന്നതായും സൂപ്പര്‍ ടെറൈന്‍ പറയുന്നു. ആകെ 100 കോപ്പി മാത്രമാണ് പുസ്തകത്തിനുള്ളത്. ഒരെണ്ണത്തിന് വില 395 യൂറോയാണ്. അതായത് 35, 500 രൂപ.