മമ്മൂക്ക തന്നെ പിറന്നാള്‍ ആഘോഷത്തിനു ക്ഷണിച്ചില്ലെന്ന് പിതാവിനോടു കരഞ്ഞുപറയുന്ന 3 വയസ്സുകാരിയോട് പിണങ്ങല്ലേ..., മോളെ കാണാന്‍ കാത്തിരിക്കുകയല്ലേ എന്ന് മമ്മൂട്ടി!
അടുത്തിടെ സമൂഹമാധ്യമങ്ങളില്‍ ശ്രദ്ധ നേടിയ ഒരു വിഡിയോയാണ് തിരൂര്‍ക്കാട് സ്വദേശിയായ 3 വയസ്സുകാരിയുടേത്. മമ്മൂക്ക തന്നെ പിറന്നാള്‍ ആഘോഷത്തിനു ക്ഷണിച്ചില്ലെന്ന് പിതാവിനോടു കരഞ്ഞുപറയുകയായിരുന്നു 3 വയസ്സുകാരി ദുആ എന്ന പീലി.
മമ്മൂട്ടി തന്റെ ഫെയ്‌സ്ബുക് പേജില്‍ ''പിണങ്ങല്ലേ എന്താ മോളുടെ പേര്..?'' എന്ന വാചകത്തോടെ കുഞ്ഞിന്റെ വിഡിയോ പങ്കുവച്ചതോടെ പീലിയെ കണ്ടെത്താന്‍ സമൂഹമാധ്യമങ്ങള്‍ തന്നെ മുന്നിട്ടിറങ്ങി. ഒടുവില്‍ കണ്ടെത്തുകയും ചെയ്തു.
ആളെ തിരിച്ചറിഞ്ഞ ഉടന്‍ തന്നെ പീലിയുടെ പിതാവ് തിരൂര്‍ക്കാട് ചവറോട് പുന്നക്കാട്ട് കുഴിയില്‍ ഹമീദലിയുടെ ഫോണിലേക്ക് മമ്മൂട്ടിയുടെ പിആര്‍ഒ റോബര്‍ട്ട് കുര്യാക്കോസിന്റെ വിളിയെത്തി. കോവിഡ് ഒന്ന് ഒതുങ്ങിയാല്‍ പീലിക്കും കുടുംബത്തിനും തന്നെ കാണാനുള്ള മമ്മൂട്ടിയുടെ ക്ഷണവും കൈമാറി.
പെരിന്തല്‍മണ്ണ മമ്മൂട്ടി ഫാന്‍സ് ആന്‍ഡ് വെല്‍ഫെയര്‍ അസോസിയേഷന്റെ ഓണ്‍ലൈന്‍ പ്രമോട്ടര്‍ കൂടിയായ ഹമീദലി, പീലിയെക്കൊണ്ട് മമ്മൂട്ടിക്ക് പിറന്നാള്‍ ആശംസ അറിയിച്ച് വിഡിയോ ചെയ്തിരുന്നു. അന്നുതന്നെ പീലിയുടെ ഉമ്മ സജ്ല ഒരു ചടങ്ങില്‍ പങ്കെടുത്തിരുന്നു. ഇതിന്റെ ഫോട്ടോ കണ്ട് ഉമ്മയും ഉപ്പയും അവളെക്കൂട്ടാതെ മമ്മൂട്ടിയുടെ പിറന്നാള്‍ ആഘോഷത്തിനു പോയതാണെന്നു പറഞ്ഞായിരുന്നു പീലിയുടെ പരിഭവക്കരച്ചില്‍.
ഹമീദലി ഇത് മൊബൈലില്‍ പകര്‍ത്തി വാട്‌സാസാപ്പില്‍ പങ്കുവച്ചതോടെ വിഡിയോ വൈറലാകുകയായിരുന്നു.
https://www.facebook.com/Malayalivartha
