രാജ്യാന്തര ക്രിക്കറ്റില്‍ ഒരേ ദിവസം 2 ട്വന്റി20 അര്‍ധസെഞ്ചുറി നേടിയ ആദ്യ താരം ആര്? എന്നാരെങ്കിലും ചോദിച്ചാല്‍ ആദ്യം മനസ്സില്‍ ഉയരുന്ന ചോദ്യം ഇതായിരിക്കും...അതെങ്ങനെ പറ്റും, ഒരു ദിവസം 2 ട്വന്റി20 അര്‍ധസെഞ്ചുറി...? ഇങ്ങനൊരു ചോദ്യം ചോദിച്ചു, മറ്റാരുമല്ല, സാക്ഷാല്‍ അമിതാബ് ബച്ചന്‍. അതേ, ഇന്ത്യന്‍ ടെലിവിഷന്‍ ചരിത്രത്തില്‍ തരംഗമായ 'കോന്‍ ബനേഗാ ക്രോര്‍പതി'യുടെ 11-ാം പതിപ്പിലായിരുന്നു ഈ ചോദ്യം ചോദിച്ചത്. പൂര്‍ണ്ണമായും മുകളില്‍ പറഞ്ഞിരുന്നതു പോലെയായിരുന്നില്ല ചോദ്യം, അല്‍പ്പം ചില വ്യത്യാസം ഉണ്ടായിരുന്നു. ആ ചോദ്യം ഇങ്ങനെ ആയിരുന്നു, രാജ്യാന്തര ക്രിക്കറ്റില്‍ ഒരേ ദിവസം രണ്ടു ട്വന്റി20 മത്സരങ്ങളിലായി 2 ട്വന്റി20 അര്‍ധസെഞ്ചുറി നേടിയ ആദ്യ താരം ആര്? ചോദ്യം ഇങ്ങനെ ആണെങ്കില്‍ അതിന് സാദ്ധ്യത ഉണ്ടെന്ന് ആരും സമ്മതിക്കും.

അമിതാഭ് ബച്ചന്‍ നല്‍കിയ ഓപ്ഷന്‍സ് ഇങ്ങനെ ആയിരുന്നു: എ. നവ്‌റോസ് മംഗല്‍, ബി. മുഹമ്മദ് ഹഫീസ്, സി. മുഹമ്മദ് ഷഹ്‌സാദ്, ഡി. ഷാക്കിബ് അല്‍ ഹസ്സന്‍. ആരുടെയും സഹായമില്ലാതെ, ഗൂഗിളില്‍ തിരയാതെ ഓപ്ഷന്‍ സി, മുഹമ്മദ് ഷഹ്‌സാദ് എന്ന ശരിയുത്തരം കണ്ടെത്തിയ എത്രപേരുണ്ട്? ശരിയുത്തരം കണ്ടെത്താന്‍ സാധിച്ചെങ്കില്‍ ഒന്നുറപ്പ്, നിങ്ങള്‍ അത്ര നിസാരരല്ല. ഏഴു കോടി രൂപ 'വിലയുള്ള' ഉത്തരമാണ് നിങ്ങള്‍ കണ്ടെത്തിയിരിക്കുന്നത്!

അതേ, ഇന്ത്യന്‍ ടെലിവിഷന്‍ ചരിത്രത്തില്‍ തരംഗമായ 'കോന്‍ ബനേഗാ ക്രോര്‍പതി'യുടെ 11-ാം പതിപ്പിലെ ഏഴു കോടി വിലയുള്ള ചോദ്യമായിരുന്നു അത്. ബോളിവുഡിലെ സൂപ്പര്‍താരം അമിതാഭ് ബച്ചന്‍ അവതാരകനായ ഷോയില്‍ ബിഹാറുകാരനായ അജീത് കുമാറിനാണ് ഈ ചോദ്യത്തിനുത്തരം നല്‍കി ഏറ്റവും ഉയര്‍ന്ന സമ്മാനത്തുകയായ ഏഴു കോടി സ്വന്തമാക്കാന്‍ അവസരം കിട്ടിയത്. നിര്‍ഭാഗ്യവശാല്‍ അജീത് കുമാറിന് ഉത്തരം പറയാനായില്ല. ചോദ്യത്തില്‍നിന്ന് പിന്‍മാറിയതോടെ ഒരു കോടി രൂപയുമായി അദ്ദേഹം ഷോയില്‍നിന്ന് മടങ്ങുകയും ചെയ്തു.

ഈ സീസണില്‍ ഒരു കോടി നേടുന്ന നാലാമത്തെ മാത്രം മത്സരാര്‍ഥിയാണ് അജീത് കുമാര്‍. ബിഹാറില്‍ ജയില്‍ സൂപ്രണ്ടായി ജോലി ചെയ്യുന്നതിനിടെയാണ് 'കോന്‍ ബനേഗാ ക്രോര്‍പതി'യില്‍ മാറ്റുരയ്ക്കാന്‍ അജീത് കുമാറിന് അവസരം ലഭിച്ചത്.

ക്രിക്കറ്റുമായി ബന്ധപ്പെട്ട ചോദ്യം 16-ാം ചോദ്യമായിരുന്നു. ശരിയുത്തരം പറഞ്ഞാല്‍ ലഭിക്കുക ഏഴു കോടി രൂപ! ഈ ഒരു ഉത്തരത്തിന്റെ മാത്രം വില ആറു കോടി! അജീത് കുമാറിന് ഉത്തരത്തെക്കുറിച്ച് യാതൊരു ധാരണയുമുണ്ടായിരുന്നില്ല. ലൈഫ് ലൈനുകളും ശേഷിച്ചിരുന്നില്ല. ഉത്തരം തെറ്റിയാല്‍ ഒരു കോടി രൂപയും നഷ്ടപ്പെടുമെന്ന സ്ഥിതിയില്‍ അജീത് ചോദ്യത്തില്‍നിന്ന് പിന്‍മാറി. പിന്നീട് വെറുതെ ഒരു ഉത്തരം തിരഞ്ഞെടുക്കാന്‍ പറഞ്ഞപ്പോള്‍ അജീത് തിരഞ്ഞെടുത്തത് ഓപ്ഷന്‍ എ, നവ്‌റോസ് മംഗലെന്ന തെറ്റുത്തരം. എന്തായാലും ഒരു കോടി കിട്ടിയതിന്റെ ആഹ്ലാദം പങ്കുവച്ചാണ് അജീത് കുമാര്‍ ഷോ വിട്ടത്.

അഫ്ഗാനിസ്ഥാന്‍ താരമായ മുഹമ്മദ് ഷഹ്‌സാദ്, ഡെസേര്‍ട്ട് ട്വന്റി20 ടൂര്‍ണമെന്റിലാണ് ഒരേ ദിവസം രണ്ടു മത്സരങ്ങളിലായി രണ്ട് അര്‍ധസെഞ്ചുറി നേടിയത്. എട്ട് ഐസിസി അസോഷ്യേറ്റ് രാജ്യങ്ങള്‍ പങ്കെടുത്ത ടൂര്‍ണമെന്റ് യുഎഇയിലാണ് നടന്നത്. ടൂര്‍ണമെന്റിന്റെ സെമി, ഫൈനല്‍ മത്സരങ്ങള്‍ ദുബായ് രാജ്യാന്തര ക്രിക്കറ്റ് സ്റ്റേഡിയത്തില്‍ ഒരേ ദിവസമാണ് നടന്നത്.

സെമിയില്‍ ഒമാനെതിരെയാണ് ഷഹ്‌സാദ് ആദ്യ അര്‍ധസെഞ്ചുറി നേടിയത്. ആദ്യം ബാറ്റു ചെയ്ത് ഒമാന്‍ ഉയര്‍ത്തിയ 151 റണ്‍സ് വിജയലക്ഷ്യം പിന്തുടരവെ, 60 പന്തില്‍ 80 റണ്‍സടിച്ച് ഷഹ്‌സാദ് അഫ്ഗാന്റെ വിജയശില്‍പിയായി. ഒന്‍പതു പന്തു ശേഷിക്കെ രണ്ടു വിക്കറ്റ് മാത്രം നഷ്ടത്തില്‍ ലക്ഷ്യത്തിലെത്തിയ അഫ്ഗാന്‍ എട്ടു വിക്കറ്റ് ജയത്തോടെ ഫൈനലില്‍ കടന്നു. സ്‌കോട്ലന്‍ഡിനെ 98 റണ്‍സിന് തകര്‍ത്തെത്തിയ അയര്‍ലന്‍ഡായിരുന്നു ഫൈനലില്‍ എതിരാളികള്‍.

കൃത്രിമ വെളിച്ചത്തില്‍ നടന്ന കലാശപ്പോരില്‍ ആദ്യം ബാറ്റു ചെയ്ത അയര്‍ലന്‍ഡ് 13.2 ഓവറില്‍ വെറും 71 റണ്‍സിന് ഓള്‍ഔട്ടായി. മറുപടി ബാറ്റിങ്ങിന് ഇറങ്ങിയ അഫ്ഗാനായി ഷഹ്‌സാദ് വീണ്ടും തകര്‍ത്തടിച്ചു. 40 പന്തില്‍ അര്‍ധസെഞ്ചുറി പിന്നിട്ട ഷഹ്‌സാദിന്റെ മികവില്‍ അഫ്ഗാന്‍ എട്ടാം ഓവറില്‍ത്തന്നെ വിജയത്തിലെത്തി.