​ഗുരുവായൂർ ഉത്സവത്തിന്റെ ആറാം വിളക്കുദിനമായ നാളെ മുതൽ ഗുരുവായൂരപ്പൻ വിശേഷ സ്വർണക്കോലത്തിൽ എഴുന്നള്ളും. നടുവിൽ 191 സ്വർണപ്പൂക്കളുടെ നടുവിൽ കൃഷ്ണൻ മുരളികയൂതിനിൽക്കുന്ന ഗോളക, അതിനുചുറ്റും പ്രഭാമണ്ഡലം, മുകളിൽ വ്യാളീമുഖം, ഇരുവശങ്ങളിലായി ദശാവതാരരൂപങ്ങൾ എന്നിവയ്ക്കു പുറമേ, ഇളക്കത്താലി, പൂക്കൾ, ചെറു കുമിളകൾ തുടങ്ങിയവകൊണ്ട് അലങ്കൃതമായതാണ് സ്വർണക്കോലം. ക്ഷേത്രത്തിൽ വിശേഷാവസരങ്ങളിൽ മാത്രമാണ് ഇത് പുറത്തെടുക്കാറുള്ളത്.

വ്യാഴാഴ്ച ഉച്ചയ്ക്ക് മൂന്നരയ്ക്ക് നടക്കുന്ന കാഴ്ചശ്ശീവേലിക്ക്‌ സ്വർണക്കോലം ആനപ്പുറത്ത് എഴുന്നള്ളിക്കും. ഉത്സവം കഴിയുന്നതു വരെ പകൽ കാഴ്ചശ്ശീവേലിക്കും പള്ളിവേട്ട, ആറാട്ട് ദിവസങ്ങളിലെ ഗ്രാമപ്രദക്ഷിണത്തിനും സ്വർണക്കോലമായിരിക്കും.

ആറാംവിളക്കു ദിനത്തിലെ ശീവേലിമേളത്തിൽ ’വകകൊട്ടൽ’ എന്നൊരു പ്രയോഗമുണ്ട്. പഞ്ചാരിമേളം അടന്തയിലേക്കു മാറുന്ന സമയത്തുള്ള മേള തനിയാവർത്തനരീതിയാണ്. മേള പ്രാമാണികൻ പെരുവനം കുട്ടൻമാരാരായിരിക്കും വക കൊട്ടിപ്പകരുന്നത്.