ടാറ്റ മോട്ടോഴ്‌സിന്റെ പൂനെ പ്ലാന്റിൽ നാല് മെഗാവാട്ടിന്റെ സോളാർ പദ്ധതി സ്ഥാപിക്കാൻ ടാറ്റ പവർ കരാർ ഒപ്പിട്ടു. ടാറ്റ മോട്ടോഴ്‌സിന്റെ പൂനെ വാണിജ്യ വാഹന നിർമ്മാണ കേന്ദ്രത്തിൽ നാല് മെഗാവാട്ടിന്റെ ഓൺ-സൈറ്റ് സോളാർ പ്രോജക്റ്റ് വികസിപ്പിക്കുന്നതിനായാണ് ടാറ്റ മോട്ടോഴ്‌സും ടാറ്റ പവറും പവർ പർച്ചേസ് എഗ്രിമെന്റിൽ (പിപിഎ) ഒപ്പുവച്ചത്. പ്രവർത്തനങ്ങളിൽ പുനരുപയോഗ ഊർജ ഉപയോഗത്തിന്റെ അനുപാതം വർധിപ്പിക്കാനാണ് കമ്പനിയുടെ നടപടിയെന്ന് ടാറ്റ മോട്ടോഴ്‌സ് അറിയിച്ചു.

ടാറ്റ മോട്ടോർസ് 2022 വരെ പുണെയിലെ പ്ലാന്റിൽ 2.1 കോടി കിലോവാട്ട് പുനസംസ്കരണ വൈദ്യുതി ഉൽപ്പാദിപ്പിക്കാൻ കഴിയുന്ന 15 മെഗാവാട്ട് സോളാർ പദ്ധതി സ്ഥാപിച്ചിരുന്നു. ഇനി വരുന്ന കുറച്ച് വർഷങ്ങൾക്കുള്ളിൽ ഊർജ്ജോപഭോഗം വർധിക്കാനുള്ള സാധ്യത കണക്കിലെടുത്ത് സൗരോർജ്ജ പ്ലാന്റുകൾ സ്ഥാപിക്കാനാണ് കമ്പനി ലക്ഷ്യമിടുന്നത്.

2022 ൽ മാത്രം രാജ്യത്തെമ്പാടുമുള്ള തങ്ങളുടെ പ്ലാന്റുകളിൽ നിന്നായി 92.39 ദശലക്ഷം കിലോവാട്ട് പുനസംസ്കരണ വൈദ്യുതിയാണ് ടാറ്റ കമ്പനി ഉൽപ്പാദിപ്പിച്ചത്. തങ്ങളുടെ പ്ലാന്റുകളിലെ മാനുഫാക്ചറിങ് പ്രവർത്തനങ്ങൾക്ക് വേണ്ടിയായിരുന്നു ഇവ ഉപയോഗിച്ചത്. ആകെ വൈദ്യുതി ഉപഭോഗത്തിന്റെ 19.34 ശതമാനം ഇതിലൂടെ നികത്താൻ കമ്പനിക്ക് സാധിച്ചിരുന്നു.