ഏത് പ്രായക്കാര്‍ക്കും വരാവുന്ന ഒന്നാണ് അനീമിയ അഥവാ വിളർച്ച. എങ്കിലും കൂടുതല്‍ കാണുന്നത് കുട്ടികളിലും പ്രായമായവരിലും ഗര്‍ഭിണികളിലുമാണ്. സാധാരണയായി പുരുഷന്മാരില്‍ 13g/dl ല്‍ താഴെയും സ്ത്രീകളില്‍ 12g/dlല്‍ താഴെയും ഗര്‍ഭിണികളില്‍ 11dg/dlല്‍ താഴെയുമാണ് ഹീമോഗ്ലോബിന്റെ അളവെങ്കില്‍ അവര്‍ക്ക് അനീമിയ ഉണ്ട് എന്ന് വേണം കരുതാൻ ,

ആവശ്യത്തിന്‌ ചുവന്ന രക്‌താണുക്കൾ ഉൽപാദിപ്പിക്കപ്പെടാത്ത അവസ്‌ഥ, ശരീരത്തിന്‌ പുനസ്‌ഥാപിക്കാൻ കഴിയാത്ത വിധം തുടർച്ചയായി രക്‌താണുക്കളെ നഷ്‌ടപ്പെടുക, രക്‌താണുക്കൾ നശിക്കുക എന്നിവയാണ്‌ പൊതുവായി പറഞ്ഞാൽ വിളർച്ചയുടെ കാരണങ്ങൾ.

ഉത്‌സാഹക്കുറവ്‌, കിതപ്പ്‌, തലവേദന, നെഞ്ചുവേദന , കാലുകളിലെ നീര്തുടങ്ങിയ ലക്ഷണങ്ങളുള്ള വിളർച്ച, രോഗതീവ്രത അനുസരിച്ച്‌ തല കറങ്ങി വീഴുന്നത്‌ മുതൽ ഹൃദയസ്‌തംഭനം വരെ വരുത്തി വെക്കാം.

കോശങ്ങളിലേക്ക് ഓക്സിജന്‍ എത്തിക്കാന്‍ ആവശ്യമുള്ളത്രയും ആരോഗ്യമുള്ള ചുവന്ന രക്താണുക്കള്‍ ഇല്ലാത്തത് കൊണ്ടാണ് വിളർച്ചയുണ്ടാകുന്നത്‌. ഒരു ചുവന്ന രക്‌താണുവിന്റെ ആയുസ്സ്‌ ഏകദേശം 120 ദിവസമാണ്‌.

പ്രധാനമായും മജ്ജയിൽ നിന്നുമാണ്‌ ഇവയുടെ ഉൽപാദനം. ആരോഗ്യമുള്ള ചുവന്ന രക്‌താണുക്കൾ ഉണ്ടാവാൻ ആവശ്യമായ ഇരുമ്പ്, വൈറ്റമിൻ B12, ഫോളിക്‌ ആസിഡ്‌ എന്നിവയുടെ കുറവ്‌ കൊണ്ട്‌ ഉൽപാദനം കുറയാം. മജ്ജയെ ബാധിക്കുന്ന രക്‌താർബുദം, വൃക്കയിൽ ഉല്പാദിപ്പിക്കപ്പെട്ട് രക്‌തമുണ്ടാക്കാൻ സഹായിക്കുന്ന ഹോർമോണായ എരിത്രോപോയറ്റിന്റെ കുറവ്‌ , കിഡ്‌നി രോഗികളിലെ വിളർച്ച എന്നിങ്ങനെ വിളർച്ചയുണ്ടാക്കുന്ന രോഗങ്ങൾ പല വിധമുണ്ട്‌. ഇവയോരോന്നും ഓരോ രീതിയിലാണ്‌ നേരിടേണ്ടത്‌.

അരിവാൾ രോഗം, സ്‌ഫീറോസൈറ്റോസിസ്‌, തലാസ്സീമിയ എന്നിങ്ങനെ രക്‌തകോശങ്ങൾ നശിക്കുന്ന രോഗങ്ങളും ഏറെയുണ്ട്‌.

ഇത്‌ കൂടാതെ, കീമോതെറാപ്പി സമയത്തും നമ്മുടെ രക്‌തകോശങ്ങൾ ഗണ്യമായി കുറയും. എന്നാൽ, ചികിത്സയുടെ കോഴ്‌സ്‌ കഴിയുമ്പൊഴെക്കും അർബുദകോശങ്ങൾ എന്നെന്നേക്കുമായി ഇല്ലാതാകുകയും രക്‌തകോശങ്ങളെ ശരീരം തിരിച്ചു പിടിക്കുകയും ചെയ്യും..

. തുടർച്ചയായ രക്‌തനഷ്‌ടം ഉണ്ടാക്കുന്ന വിരശല്യം, മൂലക്കുരു, സ്‌ത്രീകളിൽ പല കാരണം കൊണ്ടുണ്ടാകുന്ന ബ്ലീഡിംഗ്‌ എന്നിവയെല്ലാം പതുക്കെയെങ്കിലും രോഗിയെ കടുത്ത വിളർച്ചയിലേക്കും വലിയ അപകടത്തിലേക്കും തള്ളി വിടും.

സ്വാഭാവികമായി തന്നെ വിളർച്ച വരുന്ന അവസ്‌ഥകളാണ് ഗർഭം, വാർദ്ധക്യം എന്നിവ..വിളർച്ചയുടെ തോതനുസരിച്ച്‌ ചിലപ്പോൾ ഇവർക്കും ചികിത്സ നൽകേണ്ടി വന്നേക്കാം. ചുരുക്കത്തിൽ, വിളർച്ചയുടെ കാരണം കണ്ടെത്തി ചികിത്സിക്കുകയാണ്‌ വേണ്ടത്‌.

ധാരാളം ഇരുമ്പ്, ഫോളിക്‌ ആസിഡ്‌ തുടങ്ങിയവ അടങ്ങിയ ഭക്ഷണം കഴിക്കുക, വിളർച്ച ഉണ്ടാക്കുന്നത്‌ രോഗമാണെങ്കിൽ അതിനുള്ള മരുന്ന്‌ ഡോക്‌ടറുടെ നിർദേശപ്രകാരം ഉപയോഗിക്കുക, ആവശ്യമെങ്കിൽ രക്‌തദാനം സ്വീകരിക്കുക എന്നിങ്ങനെ വേണ്ടത്‌ ചെയ്യണം.

കുഞ്ഞുങ്ങളിൽ ഏറെ ബുദ്ധിമുട്ടുണ്ടാക്കുന്ന വിളർച്ചയുടെ കാരണം പ്രധാനമായും വിരശല്യമാണ്‌ . വിരയുടെ മരുന്ന് കഴിച്ചല് കുട്ടികളിൽ ഈ പ്രശ്നം പരിഹരിക്കാവുന്നതേ ഉള്ളൂ.

ഏതുതരം അനീമിയ എന്നതും രോഗകാരണവം മനസ്സിലാക്കാന്‍ സിബിസി, ഇഎസ്ആര്‍, എംസിവി, എംസിഎച്ച്, എംസിഎച്ച്‌സി, പെരിഫറല്‍ സ്മിയര്‍ തുടങ്ങിയ ടെസ്റ്റുകള്‍ സഹായിക്കും.