ഇറാനിലെ പ്രകൃതിവാതക കേന്ദ്രങ്ങള്‍ക്കു നേരെ ഇസ്രയേല്‍ ആക്രമണം. സൗത്ത് പാര്‍സിലെയും ബുഷെഹര്‍ പ്രവിശ്യയിലെയും കേന്ദ്രങ്ങള്‍ക്കുനേരെയാണ് ആക്രമണമുണ്ടായത്. ബുഷെഹറിലെ പ്രകൃതിവാതക നിലയത്തിനുനേരെ ഇസ്രയേലി ജെറ്റുകള്‍ ആക്രമണം നടത്തിയതായി ഇറാന്‍ ഔദ്യോഗിക മാധ്യമം റിപ്പോര്‍ട്ട് ചെയ്തു.

അതേസമയം, സൗത്ത് പാര്‍സിലെ പ്രകൃതിവാതക കേന്ദ്രത്തിനുേനരെയുള്ള ഇസ്രയേല്‍ ആക്രമണത്തെ ഖത്തര്‍ അലപലിച്ചു. ഖത്തര്‍ നോര്‍ത്ത് ഫീല്‍ഡിന് അനുബന്ധമായുള്ള സൗത്ത് പാര്‍സിനു നേരെയുള്ള ഇസ്രയേല്‍ ആക്രമണം അപകടകരവും നിരുത്തരവാദപരവുമാണെന്ന് ഖത്തര്‍ വിദേശകാര്യ മന്ത്രാലയ വക്താവ് മാജിദ് അല്‍ അന്‍സാരി പറഞ്ഞു.

ഊര്‍ജ ഉല്‍പാദന കേന്ദ്രങ്ങളെ ലക്ഷ്യമിടുന്നത് ആഗോള ഊര്‍ജ സുരക്ഷയ്ക്കും മേഖലയിലെ ജനങ്ങള്‍ക്കും പരിസ്ഥിതിക്കും ഭീഷണി ഉയര്‍ത്തുന്നതാണെന്നും അദ്ദേഹം കൂട്ടിച്ചേര്‍ത്തു.