എഴുത്തുകാരന്‍ സി.വി.ശ്രീരാമന്റെ ഓര്‍മ്മയ്ക്കായി അയനം സാംസ്‌കാരിക വേദി ഏര്‍പ്പെടുത്തിയ പതിമൂന്നാമത് അയനം സി.വി.ശ്രീരാമന്‍ കഥാപുരസ്‌കാരം സന്തോഷ് ഏച്ചിക്കാനത്തിന്
എഴുത്തുകാരന്‍ സി.വി.ശ്രീരാമന്റെ ഓര്‍മ്മയ്ക്കായി അയനം സാംസ്‌കാരിക വേദി ഏര്‍പ്പെടുത്തിയ പതിമൂന്നാമത് അയനം സി.വി.ശ്രീരാമന്‍ കഥാപുരസ്‌കാരം സന്തോഷ് ഏച്ചിക്കാനത്തിന്.
മാതൃഭൂമി ബുക്സ് പ്രസിദ്ധീകരിച്ച 'കവണ' എന്ന പുസ്തകത്തിനാണ് പുരസ്‌കാരം കിട്ടിയത്. 11,111 രൂപയും പ്രശസ്തിപത്രവും ഫലകവും അടങ്ങുന്നതാണ് പുരസ്‌കാരം. പുരസ്‌കാരത്തിന് അര്‍ഹമായ കൃതി തെരഞ്ഞെടുത്തത് വൈശാഖന്‍ ചെയര്‍മാനും ടി.ആര്‍.അജയന്‍, ഡോ.എന്‍.ആര്‍.ഗ്രാമപ്രകാശ് എന്നിവര്‍ അംഗങ്ങളുമായ ജൂറിയാണ് .
മലയാള കഥാവായനക്കാര്‍ക്ക് നിത്യവിസ്മയസാന്നിദ്ധ്യമാണ് സന്തോഷ് ഏച്ചിക്കാനമെന്ന് ജൂറി അഭിപ്രായപ്പെട്ടു. മുന്‍ഗാമികളും സഹയാത്രികരും ഇല്ലാത്ത ഒരൊറ്റയടിപ്പാതയിലൂടെയാണ് ഈ എഴുത്തുകാരന്റെ ഏകാന്തസഞ്ചാരം.
ധിഷണ കൊണ്ടും വൈകാരികത കൊണ്ടും വായിച്ചെടുക്കേണ്ട കവിതയുടെ ശില്‍പഘടനയുള്ള ആഖ്യാനങ്ങളാണ് ഏച്ചിക്കാനത്തിന്റെ കഥകള്‍.
ജനാധിപത്യത്തില്‍ അപ്രസക്തരാവുന്ന ജനവും, തുടരേ തുടരേ നടക്കുന്ന വംശഹത്യയും വര്‍ഗ്ഗീയ പ്രചരണങ്ങളും സാധാരണക്കാരനില്‍ ജനിപ്പിക്കുന്ന ഭയത്തെ ഈ കഥകള്‍ ആലേഖനം ചെയ്യുന്നുണ്ട്.
അപരത്വത്തിന്റെ ആഘോഷങ്ങളായി ഉപഭോക്തൃ സമൂഹങ്ങള്‍ പരിണമിക്കുന്ന സമകാലികാവസ്ഥയുടെ പ്രതിഫലനങ്ങളായി അദ്ദേഹത്തിന്റെ കഥകള്‍ വായനക്കാരനു മുന്നില്‍ തലയെടുപ്പോടെ നില്‍ക്കുന്നുവെന്നുമാണ് ജൂറിയുടെ വിലയിരുത്തല്‍.
"
https://www.facebook.com/Malayalivartha
