ലോകബാങ്ക്, പ്രളയശേഷമുള്ള കേരളത്തിന്റെ പുനര്‍നിര്‍മാണത്തിന് വാഗ്ദാനം ചെയ്ത 1750 കോടി രൂപയുടെ വായ്പ കേന്ദ്രസര്‍ക്കാര്‍ വിലക്കിനെത്തുടര്‍ന്ന് മുടങ്ങി. കേന്ദ്രസര്‍ക്കാര്‍ ലോകബാങ്കില്‍ നിന്നും കോവിഡ് പ്രതിസന്ധി കാരണം നേരിട്ടു വായ്പയെടുക്കുന്ന പശ്ചാത്തലത്തിലാണ് സംസ്ഥാനങ്ങള്‍ ഡവലപ്‌മെന്റ് പോളിസി ലോണ്‍ (ഡിപിഎല്‍) എടുക്കുന്നത് തടഞ്ഞത്. ഇതോടെ, ലോക ബാങ്കില്‍ നിന്ന് പ്രോഗ്രാം ഫോര്‍ റിസല്‍റ്റ്‌സ് (പിഫോര്‍ആര്‍) ആയി വായ്പ ലഭ്യമാക്കാനുള്ള ശ്രമങ്ങള്‍ സംസ്ഥാന സര്‍ക്കാര്‍ തുടങ്ങി. എന്നാല്‍, ഒട്ടേറെ നടപടിക്രമങ്ങളുള്ളതിനാല്‍ ഇതു വൈകും.

ലോകബാങ്ക് ഡിപി ലോണ്‍ ആയി റീബില്‍ഡ് കേരള ഡവലപ്‌മെന്റ് പ്രോഗ്രാമിന് 3500 കോടി രൂപയാണ് അനുവദിച്ചത്. ഇതില്‍ 1750 കോടി രൂപ കഴിഞ്ഞ വര്‍ഷം സെപ്റ്റംബറില്‍ ലഭിച്ചു. രണ്ടാം ഗഡു 1750 കോടി രൂപ കഴിഞ്ഞ മാസം ലഭിക്കുമെന്നായിരുന്നു പ്രതീക്ഷ. അതിനിടെയാണ് കേന്ദ്രസര്‍ക്കാരിന്റെ നിയന്ത്രണം വന്നത്.

ഡിപി ലോണില്‍ തുക മുന്‍കൂറായി ഒന്നിച്ചു ലഭിക്കുമായിരുന്നു. എന്നാല്‍ പ്രോഗ്രാം ഫോര്‍ റിസല്‍റ്റ്‌സ് (പിഫോര്‍ആര്‍) വായ്പയില്‍ തുക ഒന്നിച്ച് മുന്‍കൂറായി ലഭിക്കില്ല. പദ്ധതികള്‍ ഓരോന്നും പൂര്‍ത്തിയാകുന്ന മുറയ്ക്ക് അതിനുള്ള തുകയാണു ലഭിക്കുക. അതിനാല്‍ പണം മറ്റാവശ്യങ്ങള്‍ക്ക് ഉപയോഗിക്കാന്‍ കഴിയില്ല.