അന്താരാഷ്ട്ര വ്യോമപാതയിൽ നിർണ്ണായകമായ 'പറക്കും ഗ്യാസ് സ്റ്റേഷൻ' എന്ന് വിളിക്കപ്പെടുന്ന യുഎസ് വ്യോമസേനയുടെ കെസി-135 സ്ട്രാറ്റോടാങ്കർ (KC-135 Stratotanker) വിമാനം ഹോർമുസ് കടലിടുക്കിന് മുകളിൽ വെച്ച് കാണാതായി. ആകാശത്തുവെച്ച് ഇന്ധനം നിറയ്ക്കാൻ സഹായിക്കുന്ന ഈ കൂറ്റൻ വിമാനം അടിയന്തര ഘട്ടങ്ങളിൽ പുറപ്പെടുവിക്കുന്ന ജനറൽ എമർജൻസി അലേർട്ട് (7700 squawk code) നൽകിയതിന് പിന്നാലെയാണ് റഡാറുകളിൽ നിന്ന് അപ്രത്യക്ഷമായത്.

ഗൾഫ് മേഖലയിൽ ഖത്തറിന് സമീപമാണ് വിമാനത്തിന്റെ സിഗ്നൽ അവസാനമായി രേഖപ്പെടുത്തിയത്.പശ്ചിമേഷ്യയിൽ സംഘർഷാവസ്ഥ നിലനിൽക്കുന്നതിനിടയിലാണ് സൈനിക വിമാനം കാണാതായതെന്നതാണ് ശ്രദ്ധേയം. യുഎഇയിലെ അൽ ദഫ്ര ബേസിൽ നിന്നുമാണ് ബോയിംഗ് കെ സി സ്ട്രാറ്റോ ടാങ്കർ ടേക്ക് ഓഫ് ചെയ്തത്. ഖത്തറിന് സമീപത്ത് വച്ചാണ് ഈ വിമാനവുമായുള്ള ബന്ധം നഷ്ടമായത്.താഴ്ന്ന് പറക്കുന്നതിന് മുൻപായി വായുവിൽ വൃത്താകൃതിയിലുള്ള പാറ്റേൺ വരച്ചാണ് വിമാനം അപായ സൂചന വൽകിയത്.

ഫ്ലൈറ്റ് ട്രാക്കിംഗ് സംവിധാനങ്ങൾ നൽകുന്ന വിവരങ്ങൾ പ്രകാരം വിമാനം താഴ്ന്നു പറക്കുകയും ഖത്തറിലെ ഒരു സൈനിക താവളത്തിലേക്ക് ഗതി മാറ്റുകയും ചെയ്തിരുന്നു. മെക്കാനിക്കൽ തകരാർ, വിമാനത്തിനുള്ളിലെ തീപിടുത്തം, ആരോഗ്യപരമായ അടിയന്തര സാഹചര്യം അല്ലെങ്കിൽ പുറത്തുനിന്നുള്ള ഭീഷണി എന്നിവ ഉണ്ടാകുമ്പോഴാണ് സാധാരണയായി വിമാനങ്ങൾ 7700 എന്ന ട്രാൻസ്‌പോണ്ടർ കോഡ് നൽകാറുള്ളത്.ഗൾഫ് മേഖലയിൽ വെച്ച് ഇന്ധനം നിറയ്ക്കുന്നതിനുള്ള ദൗത്യം നിർവ്വഹിക്കുന്നതിനിടെയാണ് വിമാനം ഈ സന്ദേശം നൽകിയത്.

ഏകദേശം ഒരു മണിക്കൂറിന് ശേഷം വിമാനവുമായുള്ള എല്ലാ ബന്ധങ്ങളും വിച്ഛേദിക്കപ്പെട്ടതായി ഗൾഫ് ന്യൂസ് റിപ്പോർട്ട് ചെയ്തു.വിമാനത്തിൽ എത്ര ജീവനക്കാർ ഉണ്ടായിരുന്നു എന്ന കാര്യത്തിൽ വ്യക്തതയില്ല. സാധാരണയായി ഒരു ക്രൂ മെമ്പർ മാത്രം നിയന്ത്രിക്കുന്ന ഈ വിമാനത്തിൽ യാത്രക്കാരെയും ചരക്കുകളെയും വഹിക്കാനുള്ള ശേഷിയുണ്ട്. റഡാറിൽ നിന്ന് അപ്രത്യക്ഷമായി എന്നത് വിമാനം തകർന്നുവെന്ന് സ്ഥിരീകരിക്കുന്നില്ലെങ്കിലും, അടിയന്തര സന്ദേശത്തിന് തൊട്ടുപിന്നാലെ സിഗ്നൽ നഷ്ടമായത് ഗുരുതരമായ എന്തോ സംഭവിച്ചുവെന്ന സാധ്യത വർദ്ധിപ്പിക്കുന്നു.