നവരാത്രി ആഘോഷത്തിന് ഇന്ന് തുടക്കം.... ആനയും ആഘോഷവും ഒഴിവാക്കി ആചാരത്തിന് ഭംഗം വരുത്താതെ നവരാത്രി വിഗ്രഹങ്ങള്‍ തലസ്ഥാന നഗരത്തിലെത്തി ഭക്തിനിര്‍ഭരമായ അന്തരീക്ഷത്തില്‍ വിഗ്രഹങ്ങളെ പല്ലക്കില്‍ എഴുന്നള്ളിച്ചു. തമിഴ്‌നാട്ടിലെ പദ്മനാഭപുരത്തുനിന്ന് നെയ്യാറ്റിന്‍കര ശ്രീകൃഷ്ണസ്വാമി ക്ഷേത്രത്തില്‍ എത്തിച്ച സരസ്വതിദേവി, കുമാരസ്വാമി, ശുചീന്ദ്രം മുന്നൂറ്റിനങ്ക വിഗ്രഹങ്ങളെ ഇന്നലെ പുലര്‍ച്ചെ തിരുവനന്തപുരത്തേക്ക് എഴുന്നള്ളിച്ചു.

കരമന ആവടിഅമ്മന്‍ കോവിലില്‍ ഇറക്കിപൂജ നടന്നു. വൈകിട്ട് മൂന്നിന് ആഘോഷമില്ലെങ്കിലും ആചാരപരമായ എഴുന്നള്ളത്ത് കരമനയില്‍ നിന്നാരംഭിച്ചു. വഴിയോരത്ത് ഭക്തര്‍ പൂക്കള്‍ അര്‍പ്പിച്ചാണ് വരവേറ്റത്. സന്ധ്യയോടെ എഴുന്നള്ളത്ത് കോട്ടയ്ക്കകത്ത് പ്രവേശിച്ചു. വിഗ്രഹങ്ങള്‍ക്കൊപ്പം കൊണ്ടുവന്ന ഉടവാള്‍ കന്യാകുമാരി ദേവസ്വം മാനേജര്‍ മോഹനകുമാരനില്‍ നിന്നു ശ്രീപദ്മനാഭസ്വാമി ക്ഷേത്രംസ്ഥാനി മൂലംതിരുനാള്‍ രാമവര്‍മ ഏറ്റുവാങ്ങി. പദ്മതീര്‍ഥക്കുളത്തിലെ ആറാട്ടിന് ശേഷം സരസ്വതി ദേവിയെ നവരാത്രിമണ്ഡപത്തിലെ നല്ലിരുപ്പ് മുറിയില്‍ പൂജയ്ക്കിരുത്തി.
ശ്രീപദ്മനാഭസ്വാമി ക്ഷേത്രം വലംവച്ച ശേഷം കുമാരസ്വാമിയെ ആര്യശാല ക്ഷേത്രത്തിലേക്കും മുന്നൂറ്റിനങ്കയെ ചെന്തിട്ട ക്ഷേത്രത്തിലേക്കും പൂജയ്ക്കിരുത്തി. തുലാം ഒന്നാം തീയതിയായ ഇന്ന് തുടങ്ങുന്ന നവരാത്രിക്ക് ചില പ്രത്യേകതകളുണ്ട്. ഏഴാം ദിവസമാണ് (23ന്) ദുര്‍ഗാഷ്ടമി. അന്ന് പൂജവച്ചാല്‍ തുടര്‍ന്നുള്ള രണ്ട് ദിവസങ്ങള്‍ മഹാനവമിയാണ്. 26ന് പൂജയെടുപ്പും വിദ്യാരംഭവും.തുടര്‍ന്ന് വൈകിട്ട് പൂജപ്പുര സരസ്വതി മണ്ഡപത്തിലേക്ക് കുമാരസ്വാമിയെ എഴുന്നള്ളിച്ച് പള്ളിവേട്ട നടത്തും. 27ന് വിഗ്രഹങ്ങള്‍ക്ക് നല്ലിരുപ്പാണ്. 28ന് രാവിലെ പദ്മനാഭപുരത്തേക്ക് മടക്കയാത്ര. 30ന് വൈകിട്ട് മാതൃക്ഷേത്രങ്ങളിലെത്തും.