കെട്ടിടത്തിന് തീപിടിച്ച്‌ വൃദ്ധയും 12കാരനും ദാരുണാന്ത്യം. കൊല്‍ക്കൊത്തയിലെ ഗണേശ് ചന്ദ്ര അവന്യൂവിലാണ് സംഭവം നടന്നത് . തീ പടര്‍ന്നുപിടിക്കുമ്ബോള്‍ പ്രാണരക്ഷാര്‍ത്ഥം മൂന്നാം നിലയില്‍ നിന്ന് താഴേക്കു കുട്ടി ചാടി . വൃദ്ധയെ കുളിമുറിയില്‍ മരിച്ച നിലയിൽ കണ്ടെത്തി .  വെള്ളിയാഴ്ച രാത്രിയായിരുന്നു അഞ്ചു നില കെട്ടിടത്തിന് തീപിടിച്ചത്. കെട്ടിടത്തില്‍ അവശനിലയിലായിരുന്ന രണ്ടു പേര്‍ അടക്കം താമസക്കാരെ മുഴുവന്‍ അഗ്‌നിശമനസേന രക്ഷപ്പെടുത്തുകയും ചെയ്തു . തീ നിയന്ത്രണ വിധേയമായെന്ന് ഫയര്‍ സര്‍വീസ് മന്ത്രി സുജിത് ബോസ് വ്യക്തമാക്കി.

തീ പടരുന്നത് കണ്ട് പേടിച്ച് കുട്ടി താഴേക്കു ചാടുകയായിരുന്നു. ഗുരുതരമായി പരിക്കേറ്റ കുട്ടിയെ ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കാനായില്ല . 25ഓളം അഗ്‌നിശമന യൂണിറ്റുകളും ഹൈഡ്രോളിക് ലാഡര്‍ അടക്കം കൊണ്ടുവന്നാണ് രക്ഷാപ്രവര്‍ത്തനം ഊര്‍ജിതമാക്കിയത്.കെട്ടിടത്തിലെ പ്രധാന ഇലക്‌ട്രോണിക് ബോക്സില്‍ നിന്ന് ഷോര്‍ട് സര്‍ക്യുട്ട് മൂലമാണ് തീപിടിച്ചതെന്നാണ് പ്രാഥമിക നിഗമനം. താഴ്നിലയില്‍ പാര്‍ക്ക് ചെയ്തിരുന്ന വാഹനങ്ങള്‍ അടക്കം കത്തിനശിക്കുകയും ചെയ്തു .കെട്ടിടത്തിന് പുറത്തേക്ക് പോകാന്‍ ഒരു വഴി മാത്രമേ ഉണ്ടായിരുന്നുള്ളുവെന്നും ബൈക്കുകള്‍ പാര്‍ക്ക് ചെയ്ത് അത് തടസ്സപ്പെട്ടിരുന്നുവെന്നും അവർ അറിയിച്ചു .